మెగా ప్రాజెక్ట్ నుండి క్రిష్ అవుట్... అడ్డాల ఇన్

Posted: 08/16/2013 03:43 PM IST

మెగా ఫ్యామిలీ రెండో తరం నుండి ఇప్పటి వరకు చాలా మందే హీరోలు వెండితెర పై ఎంట్రీ ఇచ్చారు. వారిలో ఒకరిద్దరు తప్ప మిగతా వారు పెద్దగా రాణించలేక పోయారు. ఇదే కోవలో మెగా హీరో అయిన నాగబాబు కొడుకు వరుణ్ తేజ్ కూడా హీరోగా ఎంట్రీ ఇవ్వడానికి సిద్ధం అయ్యాడు. ఏ ముహుర్తాన హీరో అయిదామని అనకున్నాడో కానీ ఈయనకు అస్సలు కాలం కలిసి రావడం లేదు. సినిమాను తెరకెక్కించడానికి నిర్మాత ఉన్నా కానీ, దర్శకులు మాత్రం ఎవ్వరూ నిలవడం లేదు. మొదట ఈయన శ్రీకాంత్ అడ్డాల దర్శకత్వంలో ఎంట్రీ ఇవ్వబోతున్నాడని త్వరలోనే సినిమా సెట్స్ కి వెళ్ళబోతుందని వార్తలు వచ్చాయి. ఏమైందో ఏమో కానీ శ్రీకాంత్ అడ్డాల తప్పుకొని ఆ ప్లేస్ లోకి పూరీ వచ్చాడు. ఈయన వరుణ్ తేజను ‘అందగాడు ’ గా చూపించబోతున్నాడని వార్తలు వినిపించాయి. పూరీ చేతినుండి మరో హీరో ఎంట్రీ ఇవ్వబోతున్నాడని ప్రచారం కూడా సాగింది. ఇంతలో సీన్ రివర్స్ అయి, అంచనాలు తప్పి తలకిందులైయ్యాయి. ఆయన కూడా వరుణ్ తేజను లాంచ్ చేసే పని నుండి తప్పుకున్నాడు. చివరిగా ఈయన్ను అనతి కాలంలోనే మంచి దర్శకుడిగా పేరు తెచ్చుకున్న జాగర్లమూడి రాధాక్రిష్ణ (క్రిష్) చేతిలో పెట్టారు. కథ, తారాగణం అంతా సిద్ధం... ఇక ప్రారంభోత్సవమే ఆలస్యం అన్నట్లు చేశారు. తీరా ఈ ప్రాజెక్టు నుండి క్రిష్ కూడా తప్పుకున్నట్లు వార్తలు వస్తున్నాయి. మరి ఈయన ఎవరి చేతిలో లాంచ్ కాబోతున్నాడు అంటే... తిరిగి తిరిగి మళ్లీ శ్రీకాంత్ అడ్డాల దగ్గరికే వచ్చినట్లు ఫిలింనగర్ న్యూస్. ఏది ఏమైనా వరుణ్ తేజ్ సినిమా షూటింగ్ ప్రారంభం అయ్యేదాకా ఈయన సినిమా ఎప్పుడు ఉంటుందో చెప్పలేమంటున్నారు.