డబుల్ భేటీలో అమ్మ పంచాయతీ

Posted: 07/30/2013 11:18 AM IST

ఏళ్ల నాటి నుండి నలుగుతున్న ప్రత్యేక తెలంగాణ అంశంపై కీలక నిర్ణయం దిశగా కాంగ్రెస్‌ వడివడిగా అడుగులు వేస్తోంది. రాష్ట్ర నాయకత్వంతో ఇప్పటికే సంప్రదింపులు పూర్తి చేసిన ఆ పార్టీ హైకమాండ్‌ ఊహించని విధంగా ఒకే రోజు రెండు కీలక భేటీలకు తెరలేపింది. ఈ నెల 31న యూపీఏ సమన్వయ కమిటీ సమావేశం, ఆ తర్వాత కాంగ్రెస్‌ వర్కింగ్‌ కమిటీ(సీడబ్ల్యూసీ) భేటీ ఏర్పాటు చేయనున్నారని తొలుత వార్తలు వచ్చినప్పటికీ అంతకన్నా ఒక రోజు ముందు ఈ రోజు రెండు సమావేశాలను ఏర్పాటు చేయాలని నిర్ణయించింది. సాయంత్రం నాలుగు గంటలకు యూపీఏ భాగస్వామ్య పక్షాల సమావేశం, ఐదున్నర గంటలకు సీడబ్ల్యూసీ భేటీ జరపనున్నారు. ఈ మేరకు సభ్యులందరికి కూడా పార్టీ తరపున వర్తమానం అందింది. ఆంధ్రప్రదేశ్‌ విభజన దిశగా ఇప్పటికే సూత్రప్రాయంగా కాంగ్రెస్‌ నిర్ణయం తీసుకున్న నేపథ్యంలో యూపీఏ భాగస్వామ్య పక్షాలను కూడా అందుకు ఒప్పించే దిశగా ఈ సమావేశం ఏర్పాటు చేస్తున్నారు. పార్టీ నిర్ణయానికి మిత్రుల ఆమోద ముద్ర వేయించుకుని విభజన ప్రక్రియపై ముందుకు వెళ్లనున్నారు. సీడబ్ల్యూసీ భేటీలో పార్టీ పరంగా అధికారిక నిర్ణయం తీసుకోవడంతో పాటు ఆ తర్వాత తలెత్తే పరిణామాలపై అనుసరించాల్సిన వ్యూహాన్ని కూడా ఈ సమావేశంలో చర్చించనున్నారు.

 

రెండు భేటీల తర్వాత తెలంగాణ అంశంపై ఒక స్పష్టమైన నిర్ణయాన్ని ఈ రోజు వెల్లడించనున్నట్టు ఆంధ్రప్రదేశ్‌ వ్యవహారాల ఇంచార్జి దిగ్విజయ్‌ సింగ్‌ మీడియాకు వెల్లడించారు. అయితే యూపీఏ సమన్వయ కమిటీ, సీడబ్ల్యూసీ సమావేశాల ఎజెండాపై సర్వత్రా ఆసక్తి నెలకొంది. విభజన అంశానికి సంబధించి మూడు ప్రతిపాదనలను కాంగ్రెస్‌ యూపీఏ భాగస్వామ్య పక్షాల ముందు పెట్టనుంది. వాటిలో రాయల తెలంగాణ మొదటిది కాగా, హైదరాబాద్‌ రాజధానిగా 10జిల్లాలతో కూడిన తెలంగాణ రెండో ప్రతిపాదన. ఇక ప్రత్యేక కాల పరిమితితో హైదరాబాద్‌ను రెండు రాష్ట్రాలకు ఉమ్మడి రాజధానిగా చేయాలన్నది కాంగ్రెస్‌ మూడో ప్రతిపాదనగా ఉండనుందని ఆ పార్టీలోని విశ్వసనీయ వర్గాల సమాచారం. అదే సమయంలో తెలంగాణ ప్రకటిస్తే ఇతర రాష్ట్రాల్లో ప్రత్యేక డిమాండ్లు ఊపందుకునే అవకాశాలున్న నేపథ్యంలో వాటిని అధిగమించే వ్యూహాన్ని కూడా కాంగ్రెస్‌ సిద్ధం చేసినట్టు తెలుస్తోంది. ఇది కూడా యూపీఏ సమన్వయ కమిటీలో చర్చకు రానుంది. మరోవైపు సీడబ్ల్యూసీ ఎజెండాపై ఆ పార్టీ ఇప్పటి వరకు స్పష్టత ఇవ్వకపోయినప్పటికీ, 2001 తీర్మానం ప్రకారం రెండో ఎస్సార్సీకే ఇప్పటికీ కట్టుబడుతూ వస్తోంది. అయితే దాని స్థానంలో చేసే తీర్మానంలో తెలంగాణ ఏర్పాటు అంశాన్ని మాత్రమే పొందుపరచాలని నిర్ణయించినట్టు సమాచారం.