చిన్ని చిన్ని ఆశలో మన నాయకులు

Posted: 07/28/2013 10:48 AM IST

ష్ట్ర విభజన అంశంలో సీమాంధ్ర కాంగ్రెస్‌ నాయకుల పరిస్థితి ముందు నుయ్యి వెనుక గొయ్యి అన్న చందంగా ఉంది. మూడు రోజులుగా ఢిల్లిలో ఉంటూ పార్టీ అధిష్టానం నేతలతో సమావేశాలు జరుపుతున్నప్పటికీ స్వీయ భావి కార్యాచరణ ఏమిటో అర్ధం కాక సతమతమవుతున్నారు. అధిష్టానం నిర్ణయాన్ని ఔదలదాల్చలేని స్థితి. అలాగని గట్టిగా ఉద్యమ బాట పట్టలేని దుస్థితి. ఒక వంక ముఖ్యమంత్రి దగ్గర్నుంచీ పీసీసీ అధినేత దాకా కీలక నేతలందరికీ అధిష్టానం దూతలు జరగబోతున్నదేమిటో స్పష్టంగా చెప్పినప్పటికీ సీమాంధ్ర రాష్ట్ర మంత్రులు మాత్రం తమ పార్టీ అధికారికంగా ఏదీ ప్రకటించలేదు కదా అంటూ దాటవేత ధోరణిని అవలంబిస్తున్నారన్న విమర్శలు సర్వత్రా వినిపిస్తున్నాయి. పార్టీ అధికారికంగా ప్రకటించేదాకా వేచి చూసే ధోరణిలో పోవాలన్న ఆలోచనలో ఉన్నట్లు స్పష్టమవుతోంది. దీన్ని బట్టి సీమాంధ్ర నేతల మదిలో ఇంకా ఏదో చిన్ని చిన్ని ఆశ మిణుకు మిణుకుమంటూ కనిపిస్తున్నదని అనిపిస్తున్నదని సీమాంద్ర నాయకులు అంటున్నారు. ఒకవేళ అధిష్టానం తెలంగాణా సానుకూల నిర్ణయం తీసుకున్నప్పటికీ వీరు సంచలనాత్మక నిర్ణయాలేవీ తీసుకోకపోవచ్చన్నది కొందరు కాంగ్రెస్‌ నేతల విశ్లేషణ. అయితే మంత్రి పదవులతో పాటు పార్టీని కూడా వీడతామని అధిష్టానానికి హెచ్చరికలు పంపాలని ఒక దశలో ఆలోచించిన వీరంతా తర్వాత తమ నిర్ణయంలోని తీవ్రతను తమంతట తామే తగ్గించుకున్నారు. పార్టీని వదలబోమని, పదవులను మాత్రం వదిలే విషయాన్ని తీవ్రంగా ఆలోచిస్తున్నామని చెబుతున్నారు. దీన్ని బట్టి సీమాంధ్ర మంత్రులు, ఎమ్మెల్యేలు, ఎంపీల మనోగతం చూచాయగా తెలుస్తున్నది.