మేము సమైక్యాంధ్రకే..

Posted: 07/02/2013 03:12 PM IST

కాంగ్రెస్ పార్టీతో గొడవపడి బయటకు వచ్చిన ఎంఐఎం పార్టీ తీరు రోజు రోజుకు మారుతుంది. నిన్నటి వరకు రాయల్ తెలంగాణకే మా మద్దతు అని చాటి చెప్పిన ఎంఐఎం పార్టీ అధినేత అసదుద్దీన్ ఇప్పుడు కొత్త రాగం పాడుతున్నారు. వైఎస్సార్‌ కాంగ్రెస్ పార్టీతో సన్నిహిత సంబంధాలు పెట్టుకొని, కాంగ్రెస్ పార్టీ పై సమరభేరి మ్రోగించిన ఎంఐఎం పార్టీకి కాంగ్రెస్ దెబ్బ ఏమిటో అతి తక్కువ సమయంలోనే తెలిసివచ్చింది. కాంగ్రెస్ పార్టీ పై కత్తులు దూసిన ఆ పార్టీ నాయకులకు, కాంగ్రెస్ పార్టీ తలచుకుంటే ఏం జరుగుతుందో ప్రత్యక్షంగా ఎంఐఎం పార్టీ రుచి చూపించింది. అయితే మొదటి నుంచి ఎంఐఎం పార్టీ తెలంగాణకు మద్దతు పలికిన దాఖలు ఎక్కడ లేవు. ఎన్నికల సమయం దగ్గరపడుతున్న కొద్ది ఎంఐఎం పార్టీ అధినేత సరికొత్త నిర్ణయాలు తీసుకుంటున్నారు. ‘కొన్ని దుష్ట శక్తులు స్వార్థ ప్రయోజనాల కోసం రాష్ట్రాన్ని విచ్ఛిన్నం చేయాలని ప్రయత్నిస్తున్నాయి.

కొందరు ప్రత్యేక తెలంగాణ, మరికొందరు రాయల తెలంగాణ అంటున్నారు. అయితే మేం సమైక్యాంధ్రకే కట్టుబడి ఉన్నాం. ఏవైనా పరిస్థితులు అనుకూలించకపోతే రాయల తెలంగాణ గురించి ఆలోచిస్తాం.’ అని ఎంఐఎం అధినేత, ఎంపీ అసదుద్దీన్ ఒవైసీ స్పష్టం చేశారు. అనంతపురం జిల్లా లేపాక్షిలో జరిగిన బహిరంగసభలో ఆయన మాట్లాడుతూ, కొన్నిపార్టీలు కుట్రలు, కుతంత్రాలతో ఎంఐఎంను మతతత్వ పార్టీగా చిత్రీకరిస్తున్నాయన్నారు. కులమతాలకు అతీతంగా మానవతా దృక్పథంతో సమాజాభివృద్ధికి కృషి చేస్తున్న పార్టీ తమదేనన్నారు. ఉత్తరాఖండ్ వరద బాధితుల సహాయార్థం ఎంఐఎం ప్రత్యేక బృందాన్ని పంపిందని, దాదాపు రూ.కోటి విలువైన నిత్యావసర వస్తువులను బాధితులకు అందజేసిందని తెలిపారు. మారుతున్న పరిస్థితులను ద్రుష్టిలో పెట్టుకొని ఎంఐఎం అధినేత చాలా జాగ్రత్తగా మాట్లాడుతున్నాడని రాజకీయ విశ్లేషకులు అంటున్నారు. ఏమైన 2014లో ఎంఐఎం ఏ రాజకీయ పార్టీతో పొత్తు పెట్టుకుంటుందో , లేక స్వయంగా ఎన్నికల బరిలోకి దిగుతుందో చూడాలి.