Posted: 02/20/2013 05:24 PM IST

     మన దేశ పొరుగు ద్వీప వాసులైన మాలె లో రాజకీయ వైరాలు చాలాకాలంగా సెగలు కక్కుతున్నాయి.  ఈ సంవత్సరం  ఫిబ్రవరి 13 నుండి మాలె లోని భారత దౌత్య కార్యాలయంలో ఆ దేశపు మాజీ అధ్యక్షుడు మహమ్మద్ నషీద్ తలదాచుకుని ఉన్నారు.  ఆయన మీద అరెస్ట్ వారెంటు ఉంది.  కానీ ఆయన కోర్టులో హాజరవలేదు.  మహమ్మద్ నషీద్ అధ్యక్షుడిగా వ్యవహరిస్తున్న సమయంలో ఆయన ఛీఫ్ క్రిమినల్ జడ్జ్ అబ్దుల్లా మొహమ్మద్ ను నిర్బంధంలో ఉంచారనే ఆరోపణ ఉంది.  కానీ అది రాజకీయ కుట్రపూరితమైన ఆరోపణ అంటూ నషీద్ పార్టీ నాయకులు అంటున్నారు.  ఆ నేరారోపణ మీద అరెస్ట్ వారెంటు జారీ అవగానే నషీద్ మన దౌత్యకార్యాలయంలోకి వచ్చి అక్కడ తలదాచుకున్నారు.  విదేశ కార్యాలయాల పట్ల ఉన్న అంతర్జాతీయ కట్టుబాట్ల వలన మాలె అధికారులు భారత్ కార్యాలయంలోకి పోలేరు కనుక నషీద్ ఎనిమిది రోజులవుతున్నా అరెస్ట్ భయంతో అందులోంచి బయటకు రావటం లేదు. 

     ఈ పరిస్థితిని చక్కదిద్దటానికే మనదేశ విదేశాంగ శాఖ నుంచి అధికారుల బృందం మాలె లో అడుగుపెట్టారు.  ఈ సమస్యకు పరిష్కారం దొరికితే అంతకంటే ఆనందం మరేదీ ఉండదని విదేశాంగ వ్యవహారాల మంత్రి సల్మాన్ ఖుర్షీద్ న్యూఢిల్లీలో అన్నారు. 

     ఈ నేపథ్యంలో నషీద్ ని ఈ రోజు కోర్టులో హాజరుపరచవలసిందిగా మాల్దీవుల కోర్టు పోలీసులను ఆదేశించింది.  ఈ చిక్కు ముడిని విప్పటం కోసమే భారత విదేశాంగ శాఖ అధికారులు మాలె లోని భారత దౌత్య కార్యాలయానికి వెళ్ళారు. 

     మహమ్మద్ నషీద్ పార్టీ వర్గంలోని ప్రధాన సభ్యులు, నషీద్ ఎటువంటి పరిస్థితుల్లోనూ భారత విదేశాంగ దౌత్య కార్యాలయాన్ని వదిలి బయటకు రారని గట్టిగా చెప్పారు. 

     ఇంతకాలం మాలె పరిస్థితుల మీద నోరు విప్పని చైనా ఈరోజు ఈ సమస్యను భారత్ పరిష్కరించాలని ప్రకటించింది.  అందుకు కారణం చైనా పెట్టుబడులు ఆ దేశంలో ఉండటమే.  అయితే అక్కడ విమానాశ్రయం పర్యవేక్షించే భారత్ కి చెందిన జిఎమ్ ఆర్ సంస్థను మల్దీవ్స్ నుండి బయటకు పంపించేయటంలో చైనా ప్రమేయమేమీ లేదని అప్పట్లోనే మాలె అధ్యక్షుడు మహమ్మద్ వహీద్ ప్రకటించారు. 

      ఈ చిక్కు ముడి విడిపోయి భారత్ దౌత్య సంబంధాలు పదిలంగా ఉండాలని విదేశాంగ శాఖ వేయి దేవుళ్ళకి మొక్కుకుంటోంది.

-శ్రీజ