Posted: 01/28/2012 03:26 PM IST

ఎప్పుడు సంపద గలిగిన

నప్పుడు బంధువులు వత్తురదియెట్లన్నన్,

దెప్పలుగ చెరువునిండిన

గప్పలు పదివేలు చేరు గదరా సుమతీ

ఎప్పుడు సంపద గలిగిన- ఎప్పుడైతే ధనవంతులవుతారో, అప్పుడు- ఆ సమయంలో, బంధువులు వత్తురు- బంధువలు వస్తారు, అది ఎట్లన్నన్- అది ఎలాంటిదంటే, తెప్పలుగ చెరువునిండిన- చెరువులో నీరు బాగా నిండినట్లయితే, కప్పలు పదివేలు చేరు- కప్పలు అందులో పెద్ద సంఖ్యలో చేరతాయి.

చెరువు నిండినప్పుడే కప్పలుంటాయి. అది ఎండిపోతే అందులో కప్పలు కనపడవు. అదేవిధంగా డబ్బులున్నప్పుడే బంధవులు వచ్చి చేరుతుంటారు. ధనమంతా అయిపోయినట్లయితే ఎవరూ దగ్గరకు రారు.

ధనం లేనప్పుడు బంధువులు వచ్చినా వారిని చూసే ఆర్శిక స్తోమతుండదెలాగూ. అలాంటప్పుడు ఎవరూ రాలేదే అని అనుకోవలసిన అవసరం కూడా నిజానికి లేదు. కానీ, ఇక్కడ భౌతికమైన రాకపోకల సంగతి కాదు మాట్లాడుతున్నది. పట్టించుకోవటం గురించి. తక్కువయ్యే ఆదరణ గురించి. లేనివారితో పూసుకుని తిరగటానికి ఇష్టపడేవారు చాలా అరుదు. జోగీ జోగీ రాసుకుంటే రాలేది బూడిదే అంటారు అందుకే. బంధువులు, మిత్రులు, చుట్టాలు, పక్కాలు అంతా మీ వలన ఏదైనా లాభం ఉంటుందనుకుంటేనే మీ దగ్గరకు చేరతారు. అవసరం తీరిపోగానే, ఇక మీరు వాళ్ళకి పనికిరారని తెలియగానే మిమ్మల్ని విడిచిపెట్టేస్తారు. అందువలన, నాకు ఇంత బలగం ఉంది అన్న గర్వం రానివ్వవద్దని ఆచార్యులు హెచ్చరిస్తున్నారు.

-శ్రీజ