అస్ట్రేలియా ఓపెన్ సెమీస్ లోకి సైనా, శ్రీకాంత్

Posted: 06/10/2016 08:21 PM IST

ఆస్ట్రేలియా సూపర్ సిరీస్ బ్యాడ్మింటన్ టోర్నమెంట్లో భారత షట్లర్లు సైనా నెహ్వాల్, కిడాంబి శ్రీకాంత్లు సెమీ ఫైనల్లోకి ప్రవేశించారు. శుక్రవారం జరిగిన క్వార్టర్ ఫైనల్లో ఈ ఇరువురూ తమ తమ సింగిల్స్ విభాగాల్లో విజయం సాధించి సెమీస్కు చేరారు. మహిళల సింగిల్స్ పోరులో సైనా 28-26, 21-16 తేడాతో రాచ్నొక్ పై విజయం సాధించి సెమీస్ చేరగా, పురుషుల సింగిల్స్ విభాగంలో శ్రీకాంత్ 21-18, 21-17 తేడాతో కొరియాకు చెందిన వాంగ్ హీ హోపై గెలిచి సెమీ ఫైనల్లోకి చేరాడు.

మహిళల సింగిల్స్ భాగంగా జరిగిన క్వార్టర్ ఫైనల్లో  భాగంగా సైనా- రాచ్నాక్ల మధ్య  జరిగిన మొదటి గేమ్ హోరాహోరీగా సాగింది. అయితే కీలక సమయాల్లో రాచ్నాక్ పై పైచేయి సాధించిన సైనా  తొలి గేమ్ను గెలుచుకుంది. ఇక రెండో గేమ్లో ఆది నుంచి ఆధిపత్యం కనబరిచిన సైనా ఆ గేమ్ను కూడా సొంతం చేసుకుని సెమీస్ కు చేరింది. 56 నిమిషాల పాటు జరిగిన ఈ మ్యాచ్ లో  సైనా ఎటువంటి అలసత్వానికి ఆస్కారం ఇవ్వకుండా సెమీస్ బెర్తును ఖాయం చేసుకుంది. ఇక పురుషుల సింగిల్స్ క్వార్టర్ ఫైనల్లో శ్రీకాంత్ ఆద్యంతం ఆకట్టుకున్నాడు. 36 నిమిషాల పాటు జరిగిన పోరులో శ్రీకాంత్ అంచనాలకు మించి రాణించి సెమీస్కు చేరాడు.