ఏమనుకోవాలి ఉపశమనమా, లేక శిక్షనా..?

Posted: 12/17/2014 03:14 PM IST

అన్యాయంను ప్రశ్నించిన భారత వనితను అంతర్జాతీయ సమాఖ్య అవమానించింది. పతకాల కంటే ఆత్మగౌరవం ముఖ్యం అనుకున్నందుకు శిక్షను బహుమతిగా ప్రకటించింది. ఎదురుతిరిగి అవమానించింది అనే అక్కసుతో బాక్సర్ సరితాదేవిని ఏడాదిపాటు నిషేధిస్తూ అంతర్జాతీయ బాక్సింగ్ అసోసియేషన్ (ఐఏబీఎ) బుధవారం నిర్ణయం తీసుకుంది. ఆసియా గేమ్స్ లో జరగిన అన్యాయంను ప్రశ్నించి మెడల్ ను తిరస్కరించిన సరితపై ఆగ్రహించిన అంతర్జాతీయ బోర్డు ఈ ఘటనపై విచారణ జరిపింది. సరితకు అన్యాయం జరిగినా., ఆమె తప్పు చేసిందని నివేదిక రావటంతో శిక్ష విధించింది.

బోర్డు ఆగ్రహం నేపథ్యంలో ముందుగా కఠిన శిక్ష విధిస్తారని అనుమానం, ఆందోళన వ్యక్తం అయింది. అయితే పలువురు ప్రముఖుల మద్దతు భారత బాక్సింగ్ అసోసియేషన్ జోక్యంతో తగ్గిన అంతర్జాతీయ బోర్డు ఏడాదిపాటు నిషేధిస్తూ కసి తీర్చుకుంది. క్రమశిక్షణా చర్యల ప్రకారం ఏడాది పాటు సరితను ఆడనివ్వబోమని అంతర్జాతీయ బోర్డు ప్రకటించింది. ఈమెతో పాటు భారత్ కు కోచ్ గా వ్యవహరిస్తున్న బి.ఐ.ఫెర్నాండెజ్ పై రెండేళ్ళ నిషేధం విధించింది. అయితే జీఎస్ సంధుకు క్లీన్ చిట్ ఇచ్చింది.

2014 ఆసియా గేమ్స్ లో భారత్ తరపున ఆడిన సరతాదేవికి... రిఫరీలు అన్యాయం చేయటంతో ఓడిపోయింది. ఈ విషయాన్ని ప్రత్యర్థి బాక్సర్ కూడా అంగీకరించింది. తనకు జరిగిన అన్యాయంకు నిరసనగా మెడల్ స్వీకరించేందుకు నిరాకరించింది. దీంతో బోర్డు ఆగ్రహం వ్యక్తం చేసి ఇలా చర్యలు తీసుకుంది. ఈ తీర్పు పట్ల సరిత అభిమానులు, సన్నిహితులు ఆగ్రహం వ్యక్తం చేస్తున్నారు. అయితే క్రీడా విశ్లేషకులు మాత్రం ఇది ఆమెకు లభించిన ఉపశమనంగా భావించాలని చెప్తున్నారు.

కార్తిక్