తొలి టెస్టులో లంకేయులపై న్యూజీలాండ్ విజయం

Posted: 12/14/2015 06:59 PM IST

రెండు టెస్టుల సిరీస్ లో భాగంగా దునేదిన్ వేదికగా శ్రీలంకతో జరిగిన తొలి టెస్టులో న్యూజిలాండ్ విజయాన్ని కైవసం చేసుకుంది. లంకేయులపై 122 పరుగుల తేడాతో ఘన విజయం సాధించింది. రెండో ఇన్నింగ్స్ లో న్యూజిలాండ్ విసిరిన 405 పరుగుల ఛేదనలో శ్రీలంక బొర్లా పడింది. కేవలం 282 పరుగులకే పరిమితమై ఓటమి పాలైంది. 109/3 ఓవర్ నైట్ స్కోరుతో సోమవారం చివరి రోజు ఆట కొనసాగించిన శ్రీలంక మరో 173 పరుగుల మాత్రమే జోడించి మిగతా ఏడు వికెట్లను కోల్పోయింది.
 
శ్రీలంక ఆటగాళ్లలో కుశాల్ మెండిస్(46), చండీమాల్(58)లు ఆకట్టుకున్నా, విథానేజ్(38), మాథ్యూస్(25), సిరివర్థన(29), లక్మాల్(23) లు పెద్దగా రాణించకపోవడంతో ఘోర ఓటమి తప్పలేదు. అటు బౌలింగ్ లోనూ ముత్తయ్య మురళీధరన్ లేని లోటు స్పష్టంగా కనిపించింది. కివీస్ బౌలర్లలో సౌతీ మూడు వికెట్లు తీయగా, బౌల్ట్, సాంత్నార్, వాగ్నర్ లకు తలో రెండు వికెట్లు లభించాయి. న్యూజిలాండ్ ఆటగాడు గప్తిల్ కు మ్యాన్ ఆఫ్ ద మ్యాచ్ అవార్డు దక్కింది. దీంతో లంకతో టెస్టుసిరీస్ లలో న్యూజిలాండ్ ఒక్క మ్యాచ్ ను గెలిచి పై చేయి సాధించింది.

జి మనోహర్