పాకిస్థాన్ తో భారత్ తొలిపోరు

Posted: 10/28/2013 11:52 AM IST

వచ్చే ఏడాది మార్చిలో తెరలేవనున్న పొట్టి క్రికెట్ టి20 పప్రంచ కప్ సంగ్రామానికి సంబంధించిన షెడ్యూల్ ని ఐసీసీ విడుదల చేసింది. బంగ్లాదేశ్ లో జరగబోయే ఈ మెగా ఈవెంట్ లో భారత్ తన తొలి మ్యాచ్ ని చిరకాల ప్రత్యర్థి అయిన పాకిస్థాన్ తో తలబడబోతుంది. మార్చి 16 నుంచి ఏప్రిల్ 6 వరకు 22 రోజుల పాటు చిట్టగాంగ్, ఢాకా, సెలైత్‌లలో ఈ మెగా ఈవెంట్ జరుగుతుంది. ఈ టోర్నీలో జట్ల సంఖ్య 12 నుంచి 16కు పెరగడంతో పురుషుల ఫార్మాట్‌లో మార్పులు చేశారు.

మొదట టి20 టీమ్ ర్యాంకింగ్స్ ప్రకారం టాప్-8 జట్లు నేరుగా ప్రధాన టోర్నీ అయిన సూపర్-10 దశకు అర్హత సాధిస్తాయి. అయితే ఇందులో పాల్గొనే మరో రెండు జట్ల కోసం ఓ క్వాలిఫయింగ్ టోర్నీతో పాటు తొలి రౌండ్ పోటీలను ప్రత్యేకంగా నిర్వహిస్తున్నారు. నవంబర్ 15 నుంచి 30 వరకు యూఏఈలో జరిగే క్వాలిఫయింగ్ టోర్నీ నుంచి ఆరు జట్లు తొలి రౌండ్ పోటీలకు అర్హత సాధిస్తాయి. ఈవెంట్ ప్రైజ్‌మనీ 30 లక్షల డాలర్లు. విజేతకు 11 లక్షల డాలర్లు... రన్నరప్‌కు 5 లక్షల 50 వేల డాలర్లు ఇవ్వనున్నారు.