కటక్ వన్డేకు అన్నీ కష్టాలే... మ్యాచ్ రద్దు

Posted: 10/26/2013 09:30 AM IST

భారత్ ఆస్ట్రేలియా మధ్య నేడు కటక్ లో జరగనున్న ఐదో వన్డే భారీ వర్షాల కారణంగా రద్దయ్యే అవకాశం పుష్కలంగా కనిపిస్తుంది. గత రెండు రోజులు నుండి ఎడతెరిపి లేకుండా కురుస్తున్న భారీ వర్షాలకు స్టేడియం మొత్తం చెరువును తలపిస్తుండటంతో మ్యాచ్ ని రద్దు చేసే అవకాశాలే ఎక్కవగా కనిపిస్తున్నాయి. ఈ విషయం ఇప్పటికే దాదాపు ఖరారు అయినా ఇంకా అధికారికంగా ప్రకటించాల్సి ఉంది. ప్రస్తుత పరిస్థితుల్లో మ్యాచ్ నిర్వహణ అసాధ్యం. అయితే రద్దయినట్లు అధికారికంగా ఎంపైర్లు మైదానాన్ని పరిశీలించిన తరువాత చేయనున్నారు.

మ్యాచ్ దాదాపు రద్దయ్యే సూచనలు కనిపిస్తుండటంతో ఒరిస్సా క్రికెట్ సంఘం టిక్కెట్ల డబ్బు ఏ తేదీల్లో (నవంబరు 8-15) వాపస్ చేసేదీ ఇప్పటికే ప్రకటించింది. ఏడు వన్డేల సిరీస్‌లో ఆస్ట్రేలియా ప్రస్తుతం 2-1 ఆధిక్యంలో ఉంది. ఆరో వన్డే 30న నాగ్‌పూర్‌లో జరుగుతుంది. ఇక సిరీస్ గెలవాలంటే భారత్ కచ్చితంగా మిగిలిన రెండు మ్యాచ్‌లు గెలిచి తీరాలి. ఆసీస్ మాత్రం భారత్ ని ఎలాగైనా ఓడించి సిరీస్ ని గెలవాలనే పట్టుదలతో ఉంది.