సెమీస్ లో స్థానం దక్కించుకున్న తొలి జట్టు

Posted: 08/23/2013 10:02 PM IST

స్టార్ షట్లర్ సైనా నెహ్వాల్ వరుస విజయాలకు తోడుగా... విదేశీ ఆటగాళ్లు అంచనాలకు మించి ఆడుతుండటంతో ఇండియన్ బ్యాడ్మింటన్ లీగ్ (ఐబీఎల్)లో హైదరాబాద్ హాట్‌షాట్స్ దూసుకుపోతోంది.  సైనా నెహ్వాల్ సారథ్యంలోని హైదరాబాద్ హాట్‌షాట్స్ దాదాపుగా సెమీస్‌కు దూసుకెళ్లింది. ఐబీఎల్‌లో తొలి బెర్తు సొంతం చేసుకున్న ఫ్రాంచైజీ హైదరాబాదే. లీగ్‌లో హైదరాబాద్‌కిది మూడో విజయం. హాట్‌షాట్స్ మొత్తం 15 పాయింట్లతో అగ్రస్థానంలో ఉంది. లీగ్ దశలో బంగాబీట్స్‌తో చివరి మ్యాచ్ ఆడనుంది. మహిళల సింగిల్స్‌లో భారత నంబర్‌వన్ సైనా నెహ్వాల్ 21-7, 21-10తో పీసీ తులసీపై అలవోకగా విజయం సాధించింది. స్మాష్‌లు, డ్రాప్ షాట్లతో అలరించిన ఈ హైదరాబాదీ కేవలం 28 నిమిషాల్లోనే ప్రత్యర్థి ఆట కట్టించింది. శివ్‌ఛత్రపతి బాలేవాడీ స్పోర్ట్స్ కాంప్లెక్స్‌లో జరిగిన మ్యాచ్‌లో 3-2 తో పటిష్టమైన ముంబై మాస్టర్స్‌ను కంగు తినిపించింది.