చెన్నై చేతులెత్తేసింది... ముంబై టైటిల్ చేజిక్కించుకుంది

Posted: 05/27/2013 10:56 AM IST

 

 

 

ఎంతటి ఘనమైన జట్టుకైనా పరాభవం తప్పదు. ఇప్పటికే రెండు ఐపీఎల్ టైటిళ్ళు, ఐరుసార్లు ఫైనల్ కి వచ్చిన చెన్నై జట్టు ఊపును చూస్తే కప్ ఈ సారి కూడా వాళ్ళకే అనుకున్నారు అంతా. క్వాలిఫైయింగ్ మ్యాచ్ లో ముంబయిని దారుణంగా ఓడించి ఫైనల్ కి వచ్చిన చెన్నై జట్టు పై అంచనాలు భారీగానే ఉన్నాయి. కానీ సరిగ్గా ఫైనల్ కి రెండు రోజుల ముందు ఫిక్సింగ్ ఆరోపణలు ఎదుర్కొన్న చెన్నై జట్టు తీవ్ర ఒత్తిడికి లోనై, ఫైనల్లో ముంబయి పై ఓడిపోయి టైటిల్ ని చేజార్చుకుంది. ఇక ఇప్పటి వరకు ఒక్క టైటిల్ కూడా సాధించని ముంబయి జట్టు ఎలాగైనా ఈ టైటిల్ ని గెల్చి, తన కలను నెరవేర్చాలనుకున్నారు. దీని కోసం జట్టు యాజమాన్యం ధారాళంగా పైసలు కూడా ఖర్చు పెట్టింది. ఎట్టకేలకు జట్టుకు టైటిల్, కాసుల వర్షాన్ని కురిపించి తొలిసారి ఐపీఎల్ టైటిల్ ని నెగ్గారు.

లీగ్ మ్యాచ్ ల్లో, క్వాలిఫైయర్ మ్యాచ్ లో అద్భుతంగా రాణించిన ఈ జట్టు నిన్న రాత్రి కోల్ కత్తా ఈడెన్ గార్డెన్ లో ఫైనల్ మ్యాచ్ లోతలబడ్డాయి. ఇందులో చెన్నై ఆఖరి మెట్టుపై బోల్తాపడింది. ముంబై ఇండియన్స్ 23 పరుగుల తేడాతో చెన్నై సూపర్ కింగ్స్‌ను ఓడించి తొలిసారి టైటిల్‌ను కైవసం చేసుకుంది. టాస్ గెలిచి బ్యాటింగ్ ఎంచుకున్న ముంబై ఇండియన్స్ ఆదిలోనే టపటపా వికెట్లు కోల్పోయి కష్టాల్లో పడింది. కానీ పోలార్డ్ ఒంటరి పోరాటం (32 బంతుల్లో 60 నాటౌట్; 7 ఫోర్లు, 3 సిక్సర్లు)లతో , రాయుడు (36 బంతుల్లో 37; 4 ఫోర్లు), దినేశ్ కార్తీక్ (26 బంతుల్లో 21; 3 ఫోర్లు) రాణించడంతో ముంబై నిర్ణీత 20 ఓవర్లలో 148 పరుగులు సాధించింది. తర్వాత బ్యాటింగ్‌కు దిగిన చెన్నై 20 ఓవర్లలో 9 వికెట్లకు 125 పరుగులు చేసి ఓడింది. కెప్టెన్ ధోని (45 బంతుల్లో 63 నాటౌట్; 3 ఫోర్లు, 5 సిక్సర్లు) రాణించినా... మిగతా వారు పూర్తిగా విఫలమయ్యారు. హస్సీ (1), రైనా (0), బద్రీనాథ్ (0)లు ఏడు బంతుల వ్యవధిలో అవుట్ కావడం జట్టును దెబ్బతీసింది. రాణిస్తున్న మైక్ హస్సీ, రైనాలు, జడేజాలు పరుగులేమి చేయకుండా పెవీలియన్ చేరడంతో చెన్నై ఓటమి ముందు తలవంచక తప్పలేదు. ముంబై బౌలర్లలో మలింగ, జాన్సన్, హర్భజన్ రెండేసి వికెట్లు తీశారు. ఈ టైటిల్ సాధించడంతో ముంబై కల నెరవేరింది.