చెన్నైఎక్స్ ప్రెస్ ముంబై ఎక్స్ ప్రెస్ బ్రేకులు

Posted: 05/06/2013 10:38 AM IST

ఓడలు బండ్లు, బండ్లు ఓడలు అవ్వడం అంటే ఇదేనేమో మరి. పొట్టి క్రికెట్ ఫార్మాట్ లో ఎప్పుడు ఏ అద్భుతం జరగుతుందో చెప్పలేం. అదే నిన్న చెన్నై, ముంబయి జట్ల మధ్య జరిగిన మ్యాచ్ లో చోటు చేసుకుంది. ఈ సీజన్ లోనే అంత్యంత పటిష్టమైన జట్టుగా పేరొందడమే కాకుండా, వరుస విజయాలతో దూసుకుపోతున్న చెన్నై సూపర్ ఫాస్ట్ ఎక్స్ ప్రెస్ జట్టుకు ముంబై ఎక్స్ ప్రెస్ జట్టుకు బ్రేకులు వేసింది. నిన్న ముంబయిలోని తన సొంత స్టేడియం వాంఖడేలో జరిగిన మ్యాచ్ లో చెన్నైని చిత్తుగా ఓడించింది. ఈ ఐపీఎల్ లో అత్యంత తక్కువ స్కోరుకే ఆలౌట్ అయి ఘోర పరజయాన్ని మూటకట్టుకొంది. నిన్నటి మ్యాచ్ లో  ముంబయి బౌలర్ల ముందు ధోని ఎత్తుగడలు ఏమీ పనిచేయలేదు.  మొదట బ్యాటింగ్ ఎంచుకున్న ముంబయి జట్టు నిర్ణీత 20 ఓవర్లలో 139 పరుగులు మాత్రమే చేసింది. ఆట ప్రారంభంలో పరుగులు చేయడానికి తడబడిన ముంబయి జట్టు చివర్లో దూకుడుగా ఆడి ఆ మాత్రం స్కోరు చేసింది. కెప్టెన్‌ రోహిత్‌ శర్మ 30 బంతుల్లో 39 పరుగులు నమోదు చేయగా.. ఓపెనర్‌ స్మిత్‌ 22, దినేష్‌ కార్తిక్‌ 23, హర్భజన్‌సింగ్‌ 25 పరుగులు చేశారు.

ఇన్నింగ్స్ ముగిసిన సమయంలో చెన్నై జట్టుకు ఈ లక్ష్యం పెద్ద మేటర్ కాదనుకున్నారంతా. దీన్ని ఛేదించడానికి బరిలోకి దిగిన చెన్నై జట్టు ముంబయి బౌలర్ల ధాటికి విలవిలలాడి పోయారు. జ్ఞాన్‌ ఓజా (3/11), మిచ్చెల్‌ జాన్సన్‌ (3/27) చెరో మూడు వికెట్లు పంచుకొని చెన్నై బ్యాటింగ్‌ను చిన్నాబిన్నం చేయగా.. వారికి సహకరించిన లసిత్‌ మలింగా మూడు ఓవర్లలో కేవలం 6 పరుగులు మాత్రమే ఇచ్చి రెండు వికెట్లు తన ఖాతాలో వేసుకొని చెన్నై ఇన్నింగ్స్ ను కోలుకోలేని దెబ్బతీశాడు. దీంతో 79 పరుగలకే చాప చుట్టేసింది. ఐపీఎల్ మొత్తంలో చెన్నై జట్టుకు ఇదే అత్యల్ప స్కొరు.