కోల్ ‘ఖాతా’లో మరో విజయం

Posted: 05/04/2013 10:45 AM IST

డిపెండింగ్ ఛాంపియన్ కొల్ కత్తా నైట్ రైడర్స్ చాలా రోజుల తరువాత తన పూర్తి స్థాయి ప్రదర్శన చేసింది. ఈ సీజన్ లో అరకొర విజయాలనే సొంతం చేసుకున్న కోల్ కత్తా తన ఖాతాలో మరో విజయాన్ని వేసుకుంది. నిన్న రాత్రి తన సొంత మైదానంలో రాజస్థాన్ రాయల్స్ తో జరిగిన మ్యాచ్ లో 8 వికెట్ల తేడాతో గెలుపొందింది. బౌలింగ్, బ్యాటింగ్ విభాగాల్లో చక్కని ప్రదర్శన కనబర్చిన కోల్‌కతా రాయల్స్‌ను చిత్తుగా ఓడించింది. ఇక కోల్ కత్తా ఫ్రాంఛైజీ అత్యధిక రేటు పెట్టి కొన్న రెండో ఆటగాడు... యూసుఫ్ పఠాన్ చానాళ్ళ తరువాత తనదైన శైలిలో ఆటను ప్రదర్శించాడు. మొదట టాస్ గెలిచి బ్యాటింగ్ ఎంచుకున్న రాజస్థాన్ రాయల్స్ రాజస్థాన్ ఆరంభంలోనే తడబడింది. ఓపెనర్ రహనే (6)తో పాటు ఫౌల్క్‌నర్ (1) వికెట్‌ను కూడా ఏడు పరుగుల తేడాతో కోల్పోయిన రాయల్స్‌ను మరో ఓపెనర్ షేన్ వాట్సన్ (35; 35 బంతుల్లో 4 ఫోర్లు)తో జత కలిసిన సామ్‌సన్ 36 బంతుల్లో 40 పరుగులు చేసి ఆదుకున్నాడు. వీరిద్దరు కలిసి మూడో వికెట్‌కు 44 పరుగులు జతచేయడంతో మళ్లీ గాడిన పడ్డ రాయల్స్ గౌరవప్రదమైన స్కోరువైపు పయనించింది. కానీ చివర్లో మళ్లీ తడబాటుగు గురైనా నిర్ణీత 20 ఓవర్లలో 132 పరుగుల గౌరవ ప్రథమైన స్కోరు చేసింది.

ఈ లక్ష్యాన్ని చేధించడానికి బరిలోకి దిగిన కోల్ కత్తా ఓపెనర్లు గంభీర్, బిస్లా తొలి వికెట్ కి 41 పరుగులు జోడించి మంచి శుభారంభాన్ని ఇచ్చారు. వీరిద్దరి తరువాత క్రీజ్ లోకి వచ్చిన కల్లీస్ (33; 30 బంతుల్లో 2 ఫోర్లు, 1 సిక్స్), ఇర్ఫాన్ పఠాన్ (49; 35 బంతుల్లో 3 ఫోర్లు, 4 సిక్స్‌లు) మూడో వికెట్‌కు అజేయంగా 78 పరుగుల భాగస్వామ్యాన్ని నమోదుచేశారు. దీంతో 133 పరుగుల విజయ లక్ష్యాన్ని 17.2 ఓవర్లలోనే విజయాన్ని నమోదు చేసుకుంది. మరి ఇకనైనా కోల్ కత్తా ఇదే ఫాంను కొనసాగిస్తుందో లేదో చూడాలి.