చెన్నైకి పుణె సూపర్ షాక్

Posted: 04/16/2013 11:59 AM IST

టైటిల్ ఫేవరెట్ అయిన చెన్నై సూపర్ కింగ్స్ కి పూణె వారియర్న్ అనుకోని షాక్ ఇచ్చింది. ఇప్పటికే వరుస పరాజయాలతో ఉన్న పుణె చెన్నైని నిలువరించడం కష్టమే అనుకున్నారంత. కానీ శ్రీలంక క్రికెటర్లకు చెన్నైలో అనుమతి లేకపోవడంతో ఆ స్థానంలో వచ్చిన ఫించ్ ఆల్ రౌండ్ ప్రతిభతో ఆకట్టుకోవడమే కాకుండా మంచి స్కోరును అందించాడు. టాస్ గెలిచి బ్యాటింగ్ ఎంచుకున్న పూణే వారియర్స్ కి ఓపెనర్లు మంచి ఆరంభాన్ని ఇచ్చారు.  పుణె ఓపెనర్లు ఫించ్ (67; 45 బంతుల్లో 10 ఫోర్లు, 2 సిక్స్‌లు), రాబిన్ ఉతప్ప (26; 33 బంతుల్లో 2 ఫోర్లు) సూపర్ పర్‌ఫామెన్స్‌కు మరో బ్యాట్స్‌మన్ స్మిత్ (39) కూడా తోడవ్వడంతో వడివడిగా పరుగులు చేసిన పుణె సూపర్ కింగ్స్ ముందు 160 పరుగుల విజయ లక్ష్యాన్ని ఉంచింది. 

తరువాత భారీ లక్ష్యాన్ని చేధించడానికి బరిలోకి దిగిన చెన్నై బ్యాట్స్ మెన్స్ ని పుణె బౌలర్లు ఆదిలోనే దెబ్బతీశారు. ఇన్నింగ్స్ రెండో బంతికే ఓపెనర్ అనిరుధ (0) వికెట్‌ను కోల్పోయిన చెన్నై మరో కొద్ది సేపటికే రైనా (8) వికెట్‌ను కోల్పోయింది. అప్పటికే క్రీజ్‌లో ఉన్న ఓపెనర్ మురళీ విజయ్ (24)తో కలిసి బ్యాటింగ్ చేసిన బద్రినాథ్ (34) నికలడగా బ్యాటింగ్ చేయగా.. అనంతరం జడేజా (27) కూడా పరవాలేదనిపించాడు. ఈ క్రమంలో ఓ ఝలకిచ్చిన మార్ష్ బద్రినాథ్ , జడేజాలను పెవీలియన్‌కు చేర్చి చెన్నై దెబ్బతీశాడు. ఈ క్రమంలో క్రీజ్‌లోకి వచ్చిన ధోనీ ఈ సారి 10 పరుగులకే పెవీలియన్‌కు చేరాడు. ఆ తర్వాత మోర్కెల్ (13) కొంత ప్రతిఘటించినప్పటికీ సహచరుల సహకారం లభించలేదు. అప్పటికే దాదాపుగా మ్యాచ్‌పై పట్టు కోల్పోయిన చెన్నైని మరింత కట్టడి చేసిన పుణె వారియర్స్ బౌలర్లు 20 ఓవర్లలో 8 వికెట్ల పడగొట్టి 135 పరుగులు మాత్రమే ఇచ్చారు. దీంతో విజయానికి మరో 24 పరుగుల దూరంలో ఇన్నింగ్స్ ముగియడంతో చెన్నైకి ఓటమి తప్పలేదు.