పంజాబ్ కింగ్స్ కోల్ కత్తా చిత్తు

Posted: 04/17/2013 12:56 PM IST

కోల్ కత్తా నైట్ రైడర్స్ జట్టు గెలిచే మ్యాచ్ ని చేజేతులా పోగొట్టుకుంది. నిన్న పంజాబ్ కింగ్స్ లెవన్ తో జరిగిన మ్యాచ్ లో టాస్ గెలిచి ఫీల్డింగ్ ఎంచుకుంది.. పంజాబ్ కింగ్స్ ఎలెవన్ 20 ఓవర్లలో 9 వికెట్ల నష్టానికి 157 పరుగులు చేసింది. ఓపెనర్ మన్‌దీప్ సింగ్ (30 బంతుల్లో 41; 6 ఫోర్లు), వోహ్రా (17) రాణించడంతో తొలి పది ఓవర్లలో 70 పరుగులు చేసింది. ఆ తర్వాత కోల్‌కతా బౌలర్లు చెలరేగి చకచకా వికెట్లు తీశారు. నరైన్ హ్యాట్రిక్‌తో పాటు సేనా నాయకే కీలక వికెట్లు తీయడంతో పంజాబ్ 109 పరుగులకే ఏడు వికెట్లు కోల్పోయింది. ఈ దశలో గోని (18 బంతుల్లో 42; 4 ఫోర్లు, 3 సిక్సర్లు) చెలరేగి ఆడటంతో అనూహ్యంగా పంజాబ్ స్కోరు పరుగులు పెట్టింది. కోల్‌కతా బౌలర్లలో నరైన్, కలిస్ మూడేసి వికెట్లు తీయగా... సేనానాయకే 2 వికెట్లు సాధించాడు.

అనంతరం లక్ష్యాన్ని చేధించడానికి బరిలోకి దిగిన కోల్ కత్తా విజయాన్ని అందుకోవడానికి 4 పరుగుల దూరంలో ఆగిపోయి ఓటమిని చవిచూసింది. కోల్‌కతా ఇన్నింగ్స్‌లో గంభీర్‌ 60, మోర్గాన్‌ 47, రజత్‌ భాటియా 16, యూసుఫ్‌ పఠాన్‌ 13 పరుగులు చేసినా విజయాన్ని మాత్రం అందుకోలేక పోయింది. కోల్‌కతా నైట్‌ రైడర్స్‌ జట్టు బౌలర్‌ సునీల్‌ నరేన్‌ వరుస బంతుల్లో 3 వికెట్లు తీసి హ్యాట్రిక్‌ నమోదు చేసినా జట్టు విజయం సాధించలేకపోయింది. అల్ రౌండర్ ప్రతిభ కనబర్చిన గోనీకి మ్యాన్ ఆఫ్ ద మ్యాచ్ అవార్డు లభించింది.