Posted: 03/08/2013 07:25 PM IST

ఇటీవల మహిళలపై జరుగుతున్న అకృత్యాలు చూసి తాను చాలా కలత చెందానని భారత క్రికెటర్ గౌతమ్ గంభీర్ అన్నాడు. ముఖ్యంగా ఢిల్లీలో చోటు చేసుకుంటున్న పరిణామాలు దిగ్భ్రాంతి కలిగిస్తున్నాయన్నాడు. ‘మా ఇంటికి దగ్గర్లో ఉండే మహిళలకు అదనపు భద్రత లభిస్తుండటం మంచి పరిణామం. అయినప్పటికీ ఇందుకు సరైన హామీ మాత్రం లేదు. చదువు, ఉద్యోగం కోసం బయటకు వెళ్లిన తన కూతురు గురించి సాధారణ మనిషి ఆలోచనలు ఎలా ఉంటాయో తలుచుకుంటేనే నాకు భయమేస్తుంది’ అంటూ గౌతీ వ్యాఖ్యానించాడు. అంతర్జాతీయ మహిళా దినోత్సవాన్ని పురస్కరించుకుని గంభీర్ తన అభిమానులతో ట్విట్టర్‌లో ముచ్చటించనున్నాడు. రాత్రి 7 నుంచి 8 గంటల వరకు అతను అందుబాటులో ఉంటాడు. ‘సమస్యలు ఉన్నాయని నేను అర్థం చేసుకోగలను. మన సమాజంలో మహిళలకు సరైన గౌరవం లభించడం లేదు. కాబట్టే వాళ్లు సవాళ్లు ఎదుర్కొంటున్నారు. కానీ పరిష్కారం కూడా దాని వెనుకాలే ఉందని నా నమ్మకం. నేను నిపుణుడిని, సంస్కరణవాదిని కాదు. అయితే ఈ అంశంపై మాట్లాడేందుకు సాధారణ ప్రజలు ఓ వేదికపై రావాలని కోరుకుంటున్నా’ అని ఈ కోల్‌కతా నైట్‌రైడర్స్ కెప్టెన్ తెలిపాడు.