Posted: 03/08/2013 07:17 PM IST

 గ్రామీణ నేపథ్యం... వ్యవసాయ కుటుంబం... ఎంచుకున్న కెరీర్‌లో ఆర్థిక ప్రోత్సాహం అంతంతే... అయితే ఇవేవీ ఆ అమ్మాయికి అడ్డుకాలేదు. ఆటపై ఉన్న ఆసక్తితో పట్టుదలగా శ్రమించి భారత జట్టు తరఫున అగ్రశ్రేణి క్రీడాకారిణిగా ఎదిగింది. ఐదేళ్ల నుంచి జాతీయ జట్టుకి ప్రాతినిధ్యం వహిస్తోంది. తనలాంటి ఎందరో క్రీడాకారిణులకు స్ఫూర్తినిచ్చే ఈ విజయగాథ 23 ఏళ్ల యెండల సౌందర్యది. నిజామాబాద్‌కు చెందిన సౌందర్య ప్రస్తుతం భారత మహిళల హాకీ జట్టులో రెగ్యులర్ ప్లేయర్. ఎలాంటి ఘనమైన నేపథ్యం, ఎవరి అండదండలు లేకున్నా కేవలం స్వశక్తితో ఆమె ఈ స్థాయికి చేరుకోవడం విశేషం.

నిజామాబాద్‌కు చెందిన సౌందర్య పాఠశాల స్థాయిలోనే హాకీపై ఆసక్తి ప్రదర్శించింది. తమ స్కూల్‌కు చెందిన అనేక మంది స్థానిక గ్రౌండ్‌లో హాకీని ఆడటం చూసి ఆటపై ఇష్టం పెంచుకుంది. అయితే పురుషుల హాకీకే పెద్దగా గుర్తింపు లేదు. అందులోనూ మన రాష్ట్రంలో హాకీ పరిస్థితి చాలా దారుణంగా ఉంది. ఈ దశలో ఒక అమ్మాయి ఈ క్రీడాంశాన్ని ఎంచుకోవడం సాహసమే. కానీ సౌందర్య పట్టుదల కనబర్చింది. వ్యాయామ ఉపాధ్యాయులు మార్గదర్శనం చేయడంతో తన ఆటను మెరుగుపర్చుకుంది. ఆ తర్వాత జిల్లా స్థాయిలో, రాష్ట్ర స్థాయిల్లో వివిధ టోర్నీలలో పాల్గొని తన సత్తా చాటింది. హైదరాబాద్‌లో స్పోర్ట్స్ అథారిటీ ఆఫ్ ఇండియా (సాయ్) హాస్టల్‌లో ప్రవేశం లభించడం సౌందర్య కెరీర్‌ను మార్చేసింది.

భారత జట్టులో స్థానం...

‘సాయ్’ అకాడమీలో శిక్షణ పొందుతూ జూనియర్ స్థాయి పోటీల్లో పాల్గొన్న సౌందర్య ప్రదర్శన అందరినీ ఆకట్టుకుంది. ఫలితంగా భారత్ అండర్-18 జట్టులో తొలిసారి అవకాశం దక్కింది. ఆ తర్వాత మరికొద్ది రోజులకే సీనియర్ టీమ్‌లోకి కూడా ఈ ఆంధ్రప్రదేశ్ అమ్మాయి ఎంపికైంది. ఆస్ట్రేలియాతో జరిగిన టెస్టు సిరీస్ ఆమె తొలి టోర్నీ. అనంతరం భారత జట్టులో ఫార్వర్డ్ స్థానంలో నిలకడగా రాణిస్తూ తన చోటు పదిలం చేసుకుంది. మధ్యలో ఒకసారి చేతి గాయంతో జట్టుకు దూరమైనా... జట్టులో ఆమె ఎప్పుడూ స్థానం కోల్పోలేదు. భారత జట్టు సభ్యురాలిగా ఆస్ట్రేలియా, న్యూజిలాండ్, జర్మనీ, హాలెండ్, అర్జెంటీనా తదితర దేశాల్లో జరిగిన టోర్నీలలో పాల్గొని సత్తా చాటింది. ఇప్పటి వరకు 24 టోర్నమెంట్‌లలో కలిపి 86 అంతర్జాతీయ మ్యాచ్‌ల్లో భారత జట్టుకు ప్రాతినిధ్యం వహించింది. ఆమె ప్రదర్శనకు గత ఏడాది మరింత గుర్తింపు దక్కింది. డిసెంబర్‌లో న్యూజిలాండ్‌తో జరిగిన ఆరు టెస్టుల సిరీస్‌లో సౌందర్య జట్టు వైస్ కెప్టెన్‌గా కూడా వ్యవహరించింది. ప్రస్తుతం ఈమె సెంట్రల్ రైల్వేలో జూనియర్ క్లర్క్‌గా విధులు నిర్వహిస్తోంది.

‘నా నేపథ్యం, ప్రాంతం కారణంగా ఈ ఆట సరిపోదు అని చాలా మంది ఆరంభంలో నిరాశపరిచారు. అయితే ఆటపై ఉన్న ఇష్టంతో ఆడాను. చాలా కష్టాలు పడ్డాను కూడా. మొదలు పెట్టినప్పుడు పెద్ద లక్ష్యాలేవీ పెట్టుకోకపోయినా అంది వచ్చిన అవకాశాలు ఉపయోగించుకున్నాను. హాకీలో నేను సాధించిన ఘనత పట్ల సంతృప్తిగా ఉంది. అమ్మాయిలు ఎవరైనా తమకు ఆసక్తి ఉన్న రంగాన్నే ఎంచుకోవాలి.