Posted: 02/28/2013 06:53 PM IST

 భారత దిగ్గజ బ్యాట్స్‌మెన్ సచిన్ టెండూల్కర్ పైకి సాదాసీదాగా కనిపించినా అతని లోపల ప్రత్యర్థిని 'పరుగులు' పెట్టించే పులి దాగుంటుందని ఆస్ట్రేలియా మాజీ క్రికెటర్ మాథ్యూ హేడెన్ అభిప్రాయపడ్డాడు. భారత్‌తో ఆడడం మొదలు పెట్టినప్పటి నుంచి తానీ విషయం గమనిస్తున్నానని హేడెన్ చెప్పాడు. సచిన్‌పై విమల్ కుమార్ రాసిన 'సచిన్... క్రికెటర్ ఆఫ్ ద కంట్రీ' అనే పుస్తకంలో హేడెన్ ఈ విషయాన్ని ప్రస్తావించాడు.  '90వ దశకం ఆరంభంలో నేను తొలిసారిగా సచిన్ పేరు విన్నాను. సచిన్‌ను దగ్గర్నుంచి చూసినప్పుడు అతని పర్సనాలిటీకి, ఇమేజ్‌కి పోలికే లేదే అనిపించింది. అతనిపై ఆడినపుడుగానీ ఆ లిటిల్ మ్యాన్‌లోపల పులి దాగుందని నాకు తెలీలేదు' అని ఆ పుస్తకంలో హేడెన్ పేర్కొన్నాడు. మాస్టర్ ఘ నతను చాటే ఓ సంఘటనను హేడెన్ గుర్తుచేశాడు. 'సచిన్ గొ ప్పదనాన్ని నేను దగ్గర్నుంచి చూసి ఆస్వాదించిన సందర్భం ఒకటుంది. 2008లో మొహాలీలో జరిగిన మ్యాచ్‌లో సచిన్ టెస్టుల్లో అత్యధిక పరుగులు సాధించిన ఆటగాడిగా ప్రపంచ రికార్డు నెలకొల్పాడు.ఆ వెంటనే బాణసంచా పేలుళ్ల కార ణంగా 20 నిమిషాలపాటు ఆట నిలిచిపోయింది. ఆ సందర్భం నా కెరీర్‌లో మరువలేనిద'ని అన్నాడు.