Posted: 02/14/2013 04:16 PM IST

రెజ్లింగ్‌ను (కుస్తీ) 2020 ఒలింపిక్‌నుంచి తొలగిస్తూ ఐఓసి తీసుకున్న నిర్ణయంపై భారత ప్రముఖ రెజ్లర్‌ సుశీల్‌ కుమార్‌ మండిపడ్డాడు. ఆధునిక క్రీడ అయిన కుస్తీ పోటీలకు ప్రపంచ వ్యాప్తంగా మంచి ప్రాచుర్యం ఉందని, అందువల్ల టీవీ రేటింగ్‌ లేదనడం సరిగాదన్నాడు. లండన్‌ ఒలింపిక్స్‌ సమయంలో కుస్తీ పోటీలను విరివిగా తిలకించారు. టిక్కెట్లే దొరకలేదు. నేను అమెరికాలో శిక్షణ తీసుకుంటున్న సమయంలో అధ్యక్షుడు ఒబామా స్వయంగా విచ్చేసి పోటీలను తిలకించారని సుశీల్‌ తెలిపాడు. కాబట్టి రెజ్లింగ్‌ ప్రాచుర్యం పొందని క్రీడ అనడం కరెక్టు కాదన్నాడు. వరుసగా రెండు ఒలింపిక్స్‌లో పతకాలు గెలుచుకుని వచ్చిన సుశీల్‌ కుమార్‌ ఇంకా మాట్లాడుతూ అంతర్జాతీయ రెజ్లింగ్‌ అసోసియేషన్‌ తీసుకున్న ఈ నిర్ణయం రాబోయే యువ రెజ్లర్స్‌కు ఆశనిపాతమని వ్యాఖ్యానించాడు. వీరంతా 2020 ఒలింపిక్స్‌కు కష్టపడి తయారవుతున్నారని చెప్పాడు. మరో లక్ష్యం లేకుండా కేవలం ఒలింపిక్స్‌పై దృష్టి పెట్టిన రెజ్లర్లందరికీ తీవ్ర నిరాశ కలిగించే అంశమని అన్నాడు. లండన్‌ ఒలింపిక్స్‌లో విజయవంతంగా మన రెజ్లర్స్‌ పతకాలు గెలుచుకుని వచ్చారు. కాబట్టి ఐఓసి తీసుకున్న నిర్ణయం వీరిపై తీవ్రమైన ప్రభావం చూపిస్తుందన్నాడని సుశీల్‌ కోచ్‌ మహాబలి సత్పాల్‌ తెలిపాడు. లండన్‌ ఒలింపిక్స్‌లో సాధించిన విజయాలతో మనవాళ్లు రాబోయే ఒలింపిక్స్‌లో మరిన్ని పతకాలు అందుకోవచ్చుననే ఆశాభావంతో ఉండగా, వీరందరికీ ఈ నిర్ణయం రెజ్లింగ్‌ ఇక మానేయవచ్చునన్న అభిప్రాయాన్ని ఏర్పరుస్తున్నదని అన్నారు. రెజ్లింగ్‌ ప్రాచుర్యం పొందలేదనడం సరికాదన్నారు. బ్రెజిల్‌లో జరిగే ఒలింపిక్స్‌లో మనకు తప్పకుండా 6-7 పకతాలు దక్కుతాయని అనుకుంటున్నాం. ఇప్పుడు వారంతా ఎంతో ఆవేదన చెందుతున్నారని వ్యాఖ్యానించాడు.