Posted: 02/15/2013 08:26 PM IST

బ్లేడ్ రన్నర్‌గా ప్రసిద్ధుడైన దక్షిణాఫ్రికా అథ్లెట్ ఆస్కార్ పిస్టోరియస్ హత్య కేసులో అరెస్టయ్యాడు. మోడల్ అయిన తన ప్రియురాలు రీవా స్టీన్‌క్యాంప్‌ని పిస్టోరియస్ కాల్చి చంపినట్టు పోలీసులు అభియోగం నమోదు చేశారు. గురువారం తెల్లవారు జామున ఈ ఘటన జరిగినట్టు సమాచారం. ఓ దుండగుడు దొంగతనం చేయడానికి తన ఇంట్లోకి ప్రవేశించాడని భావించి పిస్టోరియస్ కాల్పులు జరిపాడని కథనాలు వినిపించాయి. ప్రిటోరియాలో కట్టుదిట్టమైన భద్రత ఉండే ఓ గేటెడ్ కమ్యూనిటిలో ఈ సంఘటన చోటు చేసుకుంది. స్టీన్‌క్యాంప్‌పై నాలుగు రౌండ్ల కాల్పులు జరిగాయి. ఈ సంఘటనతో పోలీసులు పిస్టోరియస్‌ను అదుపులోకి తీసుకున్నారు. అతడిని శుక్రవారం కోర్టు ముందు హాజరుపరిచే అవకాశముంది. ‘అనుమానితుడే నేరం చేశాడు. హత్యతో అతనికి సంబంధం ఉంది. సంఘటన జరిగినప్పుడు ఒక్క వ్యక్తి మాత్రమే తన ఇంట్లో ఉన్నాడు’ అని లెఫ్టినెంట్ కల్నల్ కెట్లాగో మోగాలే తెలిపారు. ఈ సంఘటనలో అనుమానితుడుగా ఉన్న ఒకే ఒక వ్యక్తి పిస్టోరియస్ అని అటూ పోలీసులు... ఇటూ అథ్లెట్ కుటుంబ సభ్యులూ ధ్రువీకరించారు.