Posted: 02/14/2013 04:12 PM IST

ఇటీవల కాలంలో తనకు లభించిన ప్రతి అవకాశాన్నీ సద్వినియోగం చేసుకుంటున్న తెలుగుతేజం రాయుడు... మరోసారి పెద్ద వేదికపై ఆకట్టుకున్నాడు. ఆస్ట్రేలియాతో వార్మప్ మ్యాచ్‌లో బోర్డు ప్రెసిడెంట్స్ ఎలెవన్ తరఫున బరిలోకి దిగిన రాయుడు (150 బంతుల్లో 87; 9 ఫోర్లు, 3 సిక్సర్లు) అర్ధసెంచరీతో రాణించాడు. ప్రెసిడెంట్స్ జట్టు తరఫున రాయుడిదే టాప్ స్కోర్. అర్ధసెంచరీ చేసింది కూడా తనొక్కడే. బంతితో ఏడు వికెట్లు తీసిన కాశ్మీర్ కుర్రాడు పర్వేజ్ రసూల్ (54 బంతుల్లో 36; 4 ఫోర్లు, 1 సిక్సర్) బ్యాటింగ్‌లోనూ రాణించి ఆక ట్టుకున్నాడు.  గురునానక్ కాలేజి మైదానంలో జరిగిన ఈ రెండు రోజుల వార్మప్ మ్యాచ్ డ్రాగా ముగిసింది. తొలిరోజు ఆసీస్ 241 పరుగులకు ఆలౌట్ కాగా... రెండో రోజు బుధవారం బోర్డు ప్రెసిడెంట్స్ ఎలెవన్ తొలి ఇన్నింగ్స్‌లో 68.3 ఓవర్లలో 230 పరుగులకు ఆలౌటయింది. ఓపెనర్లు ముకుంద్ (21), ఉతప్ప (24), పార్థీవ్ పటేల్ (23) ఫర్వాలేదనిపించారు. 47/2 స్కోరు వద్ద క్రీజులోకి వచ్చిన రాయుడు 213/8 స్కోరు వద్ద అవుటయ్యాడు. ఒక ఎండ్‌లో సహచరులు వెనుదిరుగుతున్నా... ఈ తెలుగు కుర్రాడు చెక్కుచెదరని ఏకాగ్రతతో ఆడాడు. ‘బర్త్‌డే బోయ్’ రసూల్, రాయుడు కలిసి ఏడో వికెట్‌కు 67 పరుగులు జోడించారు. ఈ భాగస్వామ్యం లేకపోతే బోర్డు జట్టు కుప్పకూలేదే. ఆసీస్ బౌలర్లలో పేసర్ హెన్రిక్స్ నాలుగు వికెట్లతో ఆకట్టుకున్నాడు. స్పిన్నర్ లియోన్ మూడు వికెట్లు తీశాడు. ఆస్ట్రేలియా జట్టు రెండో ఇన్నింగ్స్‌లో నాలుగు ఓవర్లలో వికెట్ నష్టపోకుండా 15 పరుగులు చేసింది. ఫలితం వచ్చే అవకాశం లేకపోవడంతో మ్యాచ్‌ను ముందుగానే నిలిపివేశారు.