Posted: 02/12/2013 12:48 PM IST

భారత క్రికెటర్ హర్భజన్ సింగ్ ముంబై నగరంలో క్రికెట్ అకాడమీని ప్రారంభించాలని యోచిస్తున్నాడు. ఇందుకు సంబంధించి సోమవారం అతను ముంబై మున్సిపల్ కార్పొరేషన్ (బీఎంసీ) అధికారులను కలిశాడు. అకాడమీకి సంబంధించి కమిషనర్ సీతారామ్ కుంతేకు అతను ప్రతిపాదనలు ఇచ్చినట్లు సమాచారం. ‘క్రికెట్ శిక్షణకు అంధేరీ స్పోర్ట్స్ కాంప్లెక్స్ తగిన స్థలంగా భావిస్తున్నాను.బీఎంసీ పాఠశాలల విద్యార్థులకు ఉచితంగా, బయటివారికి నామమాత్రపు ఫీజుతో ఇక్కడ కోచింగ్ ఇస్తాం’ అని భజ్జీ వెల్లడించాడు. అయితే హర్భజన్ కేవలం ఈ విషయాన్ని అనధికారికంగా చర్చించాడని... అకాడమీలో ఎవరికి శిక్షణ ఇవ్వాలనుకుంటున్నాడో తదితర వివరాలు స్పష్టంగా తెలియజేస్తూ పూర్తి స్థాయి ప్రతిపాదనలు ఇచ్చిన తర్వాతే ఈ అంశాన్ని పరిశీలిస్తామని మరో అధికారి స్పష్టం చేశారు. పంజాబ్ స్వస్థలం అయినా గత ఐదేళ్లుగా ముంబై ఇండియన్స్ జట్టు సభ్యుడిగా భజ్జీకి నగరంతో అనుబంధం కొనసాగుతోంది.