Posted: 01/30/2013 12:24 PM IST

భారత జట్టులో గత కొంతకాలం నుండి ఫామ్ లో లేక చోటు దక్కించుకోలేక పోతున్న భారత స్పిన్ బౌలర్ హర్భజన్ సింగ్ రూటు మార్చి మరో వేదికపై తన అదృష్టాన్ని పరీక్షించుకోనున్నాడు. ఆఫ్ స్పిన్నర్ హర్భజన్ సింగ్ తాజాగా మరో వ్యాపకంపై దృష్టి పెట్టాడు. 32 ఏళ్ల భజ్జీ సినీ నిర్మాతగా మారబోతున్నాడు. తన మాతృభాష పంజాబీలో రెండు సినిమాలు నిర్మిస్తున్నానని అతను వెల్లడించాడు. ‘నేను నిర్మించే చిత్రాల కథ, దర్శకుడి ఎంపిక పూర్తయ్యాయి. ఇవి కామెడీ ప్రధానంగా ఉంటాయి. ఇందులో నటించేందుకు కొంత మంది ప్రముఖ బాలీవుడ్, పంజాబీ నటులతో చర్చలు కొనసాగుతున్నాయి. భారత్‌తో పాటు విదేశాల్లోనూ నా సినిమాలు అలరిస్తాయనే నమ్మకముంది ’ అని భజ్జీ చెప్పాడు. ఈ చిత్రాల్లో తాను నటించనని, క్రికెట్ తన ప్రధాన వ్యాపకమని అతను అన్నాడు. ముంబై పరిసరాల్లో కెప్టెన్ ధోనితో కలిసి భజ్జీ రియల్ ఎస్టేట్ వ్యాపారం కూడా చేస్తున్నట్లు సమాచారం.