Posted: 01/29/2013 11:26 AM IST

ముంబయి రంజీ జట్టు మరోసారి తనకు ఎవరూ సాటి లేరని నిరూపించుకుంది. సౌరాష్ట్రతో జరిగిన రంజీట్రోఫీ ఫైనల్లో ఘన విజయం సాధించి, 40వ సారి టైటిల్ గెలుచుకున్న జట్టుగా రికార్డు నెలకొల్పింది. వాఖండే స్టేడియంలో జరిగిన ఈ మ్యాచ్ లో ముంబయి ఇన్నింగ్స్ 125 పరుగల తేడాతో సౌరాష్ట్ర పై గెలిచింది. రెండు సీజన్ల అనంతరం ముంబై చాంపియన్‌గా నిలిచింది. చివరిసారిగా 2009-10లో కర్ణాటకను ఓడించింది. విజేతగా నిలిచిన ముంబై జట్టుకు రూ. రెండు కోట్ల ప్రైజ్‌మనీ లభించగా, రన్నరప్ సౌరాష్ట్రకు రూ.కోటి దక్కింది. దీంతో ముంబై ఇరానీ కప్‌లో రెస్టాఫ్ ఇండియా జట్టుతో తలపడే అర్హత సాధించింది. పేసర్లు అగార్కర్ (4/15), ధావల్ కులకర్ణి (5/32) బౌలింగ్ ధాటికి సౌరాష్ర్ట తమ రెండో ఇన్నింగ్స్‌లో పేక మేడలా కూలి మూడో రోజే మ్యాచ్‌ను అప్పగించింది.

వీరి జోరుకు కేవలం 36.3 ఓవర్లలో 82 పరుగులు మాత్రమే చేయగలిగింది. చివరి వరుస బ్యాట్స్‌మెన్ ధరేంద్ర జడేజా (22), శాండిల్య (16) మాత్రమే రెండంకెల స్కోరు సాధించారు. అంతకుముందు ముంబై తమ తొలి ఇన్నింగ్స్‌లో 119 ఓవర్లలో 355 పరుగులకు ఆలౌటయ్యింది. దీంతో 207 పరుగుల భారీ తొలి ఇన్నింగ్స్ ఆధిక్యం లభించింది. హికేన్ షా (55), అంకిత్ చవాన్ (41) రాణించారు. మక్వానాకు మూడు, త్రివేది, శాండిల్య, ధర్మేంద్ర జడేజాలకు రెండేసి వికెట్లు దక్కాయి. అనంతరం తమ రెండో ఇన్నింగ్స్‌ను ప్రారంభించిన సౌరాష్ట్రను ముంబై పేసర్లు చక్కటి లైన్ అండ్ లెంగ్త్ బంతులతో వణికించారు. క్రీజులో కుదురుకోవడానికి కూడా సమయమివ్వకుండా తొలి ఓవర్ నుంచే వికెట్ల పతనాన్ని ప్రారంభించారు.