Posted: 01/18/2013 01:20 PM IST

రాంచీ వన్డే సందర్భంగా ధోని కుటుంబానికి కాంప్లిమెంటరీ పాస్‌లు ఇవ్వకపోవడం వివాదాస్పదమైంది. ఈ విషయమై ధోని అన్నయ్య నరేంద్ర జార్ఖండ్ స్టేట్ క్రికెట్ అసోసియేషన్ (జేఎస్‌సీఏ)పై మండిపడ్డాడు. ‘మా తల్లిదండ్రులకు ఇంతవరకు టికెట్లు పంపలేదు. ఈ విషయమే అసోసియేషన్ వర్గాలకు ఎన్నిసార్లు ఫోన్ చేసినా స్పందన లేదు. మా బావమరిదికి మాత్రం 14 టికెట్లు పంపినట్టు తెలిసింది. అదేదో నేరుగా మా తల్లిదండ్రులకు ఇస్తే తప్పేంటి ? రాంచీకి బ్రాండ్ అంబాసిడర్ అయిన ధోని కుటుంబాన్ని జేఎస్‌సీఏ అవమానించింది. కేవలం రాజకీయ కారణాల వల్లే వాళ్లు ఈ విధంగా వ్యవహరించారు. మ్యాచ్ సందర్భంగా మా తల్లిదండ్రుల్ని గుర్తించాల్సిన బాధ్యత వారికి లేదా ? ప్రతి చిన్న విషయానికి మేం ధోని చేత సిఫారసు చేయించుకోలేం. అయినా టికెట్లు కొనుక్కునే స్థోమత మాకుంది’ అని ధోనికంటే పదేళ్లు పెద్దవాడైన నరేంద్ర అసోసియేషన్ అధికారులపై తీవ్రస్థాయిలో ధ్వజమెత్తాడు.