Posted: 12/15/2012 03:05 PM IST

కలిసొచ్చే కాలం ఉంటే... నడిసొచ్చే కొడుకు పుడతాడు అనే సామెత ఉంది. ఇప్పుడు ఈ సామెత భారత షట్లర్ సైనా నెహ్వాల్ కి అతికినట్లు సరిపోయింది. వరల్డ్ సూపర్ సిరీస్ ఫైనల్స్ లో తొలి రెండు మ్యాచ్ లో పరాజయం పాలై, చావో రేవో తేల్చుకొని, ఇంకో క్రీడాకారిణి విజయం పై ఆధారపడ్డ సైనా నెహ్వాల్ కి అంతా కలిసి వచ్చింది. గ్రూప్ ‘బి ’ చివరి రౌండ్ లీగ్ మ్యాచ్‌లో సైనా 21-7, 21-18తో రెండో సీడ్, ప్రపంచ నాలుగో ర్యాంకర్ జూలియన్ షెంక్ (జర్మనీ)పై గెలిచి సెమీఫైనల్లోకి దూసుకెళ్లింది. ఇదే గ్రూప్‌లోని మరో మ్యాచ్‌లో వరల్డ్ జూనియర్ మాజీ చాంపియన్ ఇంతనోన్ రత్చనోక్ (థాయ్‌లాండ్) 21-15, 21-14తో ఆల్ ఇంగ్లండ్ మాజీ చాంపియన్ టిన్ బౌన్ (డెన్మార్క్)ను ఓడించింది. దాంతో రత్చనోక్ వరుసగా మూడో విజయంతో గ్రూప్ ‘టాపర్’గా నిలిచింది. ఒక్కో విజయం సాధించిన సైనా, టిన్ బౌన్, షెంక్ ఉమ్మడిగా రెండో స్థానంలో నిలిచారు. దాంతో మెరుగైన గేమ్‌ల ఆధారంగా ఈ గ్రూప్‌లో రెండో స్థానంలో నిలిచిన సైనాకు సెమీఫైనల్ స్థానం దక్కింది. దీంతో సైనా ఇవాళ వరల్డ్ నెంబర్ వన్ తో సెమీ ఫైనల్లో తలపడనుంది.