ఉసిరి తినండి.. నిత్యయవ్వనంగా వుండండి!

Posted: 04/29/2015 03:12 PM IST

ప్రకృతిలో సహజంగా లభించే కొన్ని పదార్థాల్లో మానవ శరీరానికి అవసరమయ్యే పోషకాలు నిల్వవుంటాయని నిపుణులు తమ పరిశోధనల ద్వారా వెల్లడించిన విషయం విదితమే! అటువంటి వాటిలో ఉసిరికాయ కూడా ఒకటి! ఇది ఆరోగ్యాన్ని ఎంతో మేలు చేయడంతోపాటు సౌందర్యాన్ని మెరుగుపరుస్తుందని ఆరోగ్యా నిపుణులు అంటున్నారు. ఎందుకంటే.. ఇందులో ఎన్నోరకాల పోషకాలు, ఖనిజాలు నిల్వవుంటాయని.. ముఖ్యంగా చర్మసౌందర్యానికి కావలసిన ఔషధగుణాలు మరెన్నో వుంటాయని వారు పేర్కొంటున్నారు. మరి.. ఉసిరిలో వుండే పోషకాలు.. వాటి వల్ల కలిగే ప్రయోజనాలేంటో తెలుసుకుందామా...

* ఉసిరి కాయలో విటమిన్ సి పుష్కలంగా ఉంది. ఇది శరీరానికి కావలసినంత ఎనర్జీని అందించడంతోపాటు వ్యాధినిరోధక శక్తిని పెంచుతుంది. తద్వారా రోజంతా హుషారుగా అన్ని కార్యకలాపాల్లోనూ పాల్గొనవచ్చు. కాబట్టి.. ఉసిరిని ఎంత ఎక్కువగా తింటే అంతే ఆరోగ్యానికి మంచిది. నీరసంగా వున్న సమయంలో ఎనర్జీ లెవెల్స్ ను పెంచుకోవాలంటే ఉసిరి తింటే చాలు.

* ఈ ఉసిరికాయలను మధుమేహగ్రస్థులు తరచూ తీసుకుంటే.. ఆ సమస్య నుంచి ఉపశమనం పొందడంతోపాటు నిత్యయవ్వనులుగా ఉండొచ్చునని ఆరోగ్య నిపుణులు అంటున్నారు. ఎందుకంటే.. ఇందులో మధుమేహ వ్యాధిని నిరోధించే పోషక విలువలు ఎన్నో నిల్వవుంటాయి. అలాగే.. చర్మరక్షణకు కావలసిన ఇతర ఖనిజాలు కూడా వుంటాయి.

* ఉసిరికాయలో క్యాల్షియం, ఐరన్ వంటి ధాతువులు ఎంతో పుష్కలంగా వుంటాయి. ఇవి జుట్టును నెరసిపోకుండా చేయడంలో తమవంతు పాత్రను పోషిస్తాయి. కేశ సంరక్షణలో ఉసిరికాయ కీలకపాత్ర పోషిస్తుందని చెప్పుడంలో ఎటువంటి అతిశయోక్తి లేదు. ఈ కాయ జుట్టుకు బలాన్నివ్వడమే కాకుండా హెయిర్ ఫాల్‌ను చాలా వరకు తగ్గిస్తుంది కూడా!
 
* ఇక ఆరోగ్యపరంగా చూస్తే.. ఈ ఉసిరికాయ హృద్రోగ సమస్యలను దూరం చేస్తుంది. వ్యాధినిరోధక శక్తినిచ్చే ఉసిరి.. గుండెపోటును నియంత్రిస్తుంది. అలాగే.. కంటి దృష్టి లోపాలను నయం చేస్తుంది. ఉదర సంబంధిత సమస్యల్ని నయం చేస్తుంది. వయస్సు మీద పడినా ఉసిరిని ఆహారంలో చేర్చుకోవడం ద్వారా యంగ్‌గా కనిపిస్తారని ఆరోగ్య నిపుణులు అంటున్నారు.