స్వీట్‌కార్న్‌లో దాగివున్న ఆరోగ్య ఔషధాలు

Posted: 03/24/2015 06:31 PM IST

సాధారణంగా ప్రకృతిలో లభించే కొన్ని ఆహారాల్లో ఆరోగ్యాన్ని మెరుగుపరిచే ఎన్నై ఔషధగుణాలు దాగి వుంటాయి. వివిధరకాల పండ్లు, కూరగాయలు, ఆకుకూరల్లో విటమిన్లు, ఖనిజాలు, ఇతర పోషక విలువలు దాగి వుంటాయి కాబట్టి.. రెగ్యులర్ డైట్ లో వాటితో తయారుచేయబడ్డ ఆహారాలనే ఎక్కువగా తీసుకోవాలని వైద్య నిపుణులు కూడా సలహాలు ఇస్తారు. అలాగే.. వీటిపై పరిశోధనలు జరిపిన శాస్త్రజ్ఞులు.. ఏ పండ్లలో ఎంతమేర పోషకాలు నిల్వవవున్నాయనే అంశంపై పరిశోధనలు చేసి మరీ అందుకు సంబంధించి సూచనలు కూడా ఇస్తున్నారు. కాబట్టి.. వాటిని ప్రతిరోజూ తీసుకుంటే ఎంతో ఆరోగ్యంగా మెలగవచ్చు.

అటువంటి పోషక విలువలు కలిగిన ఆహారాల్లో స్వీట్ కార్న్ కూడా ఒకటి! ఇందులో మానవ శరీరానికి అవసరమయ్యే ఎన్నో పోషకాలు నిల్వవున్నాయి. ముఖ్యంగా వీటిలో విటమిన్ బి, సీలతోపాటు మెగ్నీషియమ్, పొటాషియం వంటి ఖనిజాలున్నాయి. ఇంకో విషయం ఏమిటంటే.. పసుపురంగులో ఉన్న స్వీట్‌కార్న్‌లో యాంటీఆక్సిడెంట్స్ ఎక్కువ మోతాదులో నిల్వవుంటాయి. ఇవి.. కళ్లకు ఎంతో మేలు చేస్తాయి. అంటే.. కంటిచూపును మెరుగుపర్చడం, ఇతర ఇబ్బందుల నుంచి రక్షణ కల్పించేలా అవి పనిచేస్తాయి. కాబట్టి.. కంటిసమస్యతో బాధపడుతున్నవారు ఈ స్వీట్ కార్న్ ప్రతిరోజూ తీసుకుంటే ఫలితం పొందవచ్చు.

అలాగే.. ఈ స్వీట్ కార్న్ లో అరటిపండ్లలో కంటే చక్కెర శాతం తక్కువగా ఉంటుంది. అరటిపండ్లలో 15 గ్రాముల చక్కెర ఉండగా.. వీటిలో మాత్రం కేవలం 6 నుంచి 8 గ్రాములే ఉంటుంది. కాబట్టి.. షుగర్ వ్యాధి వున్నవారు ఈ స్వీట్ కార్న్ ని తీసుకోవచ్చు. ఇక ఇందులో ఫైబర్ కంటెంట్ ఎక్కువగా ఉండటంతోపాటు ఎన్నో పోషకాలున్నాయి కాబట్టి.. ‘స్వీట్ కార్న్’ ఆరోగ్యానికి ఎంతో మేలు చేస్తుందని పోషకాహార నిపుణులు అంటున్నారు.