లివిన్ రిలేషన్ షిప్ అంటే.. సంస్కృతి, సంప్రదాయాలకు కట్టుబడి వుండకుండా, తమకు నచ్చిన విధంగా ఇద్దరు వ్యక్తులు కలిసి జీవించడం. ఇది ప్రస్తుత కాలంలో ఉద్భవించిన ఒక అనధికారిక వివాహం. చాలావరకు దేశాలలో ఇది ఇంకా గుర్తింపు కాలేదు. వీటికి సంబంధించిన చట్టాలు కూడా అమలులోకి రాలేదు.

అదేవిధంగా తూర్పు దిశలలో వున్న సంస్కృతుల్లో కూడా ఇది నిషేధించబడింది. అయితే పాశ్చాత్య కాలంలో వున్న యువతీయువకులు లివిన్ రిలేషన్ షిప్ లో వుండడం అంగీకరిస్తున్నారు. ఎందుకంటే.. ఇందులో చాలామంది తమకు అనుగుణంగా సౌలభ్యాలను, స్వేచ్ఛను పొందుతారు. 

సాధారణంగా వివాహం అనేది సంస్కృతి సంప్రదాయాలతో కూడిన వ్యవహారం. అదే లివిన్ రిలేషన్ లో ఇటువంటి పద్ధతులుకానీ, కట్టుబాట్లుకాని వుండవు. వివాహం చేసుకున్న దంతపులు, తమ దాంపత్య జీవితాన్ని సుఖంగా గడపక, ఎప్పుడూ గొడవలు జరుగుతుంటే.... అప్పుడు వారు విడిపోవడానికి విడాకులు, ఇంకా ఇతరత్ర సమస్యలు పరిష్కరించుకోవడానికి కొన్ని నియమాలను పాటించాల్సి వుంటుంది.

అదే లివిన్ రిలేషన్ లో అయితే ఇటువంటి వ్యవహారాలు వుండవు. ఒకరిమీద ఇంకొకరికి ఎటువంటి బాధ్యతలు లేకుండా తమ జీవితాన్ని స్వేచ్ఛగా అనుభవిస్తుంటారు. చాలావరకు లివిన్ రిలేషన్ లో వున్నవారికి గొడవలు జరగవు. ఒకవేళ ఇటువంటి అవాంతరాలు వారిమధ్య వస్తే.. ఎటువంటి సందేహాలు లేకుండా విడిపోతారు. 

ఇలా లివిన్ రిలేషన్ పద్ధతిని ఫాలో అవుతున్న యువతీయువకులు... దానిమీద వారికున్న కొన్ని భావనలను ఈవిధంగా పేర్కొంటున్నారు. 

లివిన్ రిలేషన్ లో వివాహానికి సంబంధించిన చట్టపరమైన, సాధారణ నిబంధనలకు లోబడి వుండాల్సిన అవసరం లేదు. తమ జీవితాన్ని స్వాతంత్ర్యంగా, సౌకర్యవంతంగా జీవించడానికి అనువుగా వుంటుంది. కొత్త తరాలను కూడా ఆకట్టుకునేలా వుంటుంది. 

లివిన్ రిలేషన్ లో పిల్లల ప్లానింగ్ కు సంబంధించిన ఆధిపత్యం వుండదు. ఒకరిమీద ఇంకొకరు బాధ్యతగా వుండాలనే బలవంతం వుండదు. 

లివిన్ రిలేషన్ లో వున్నవారు తమ భాగస్వామితో ఆర్థికపరమైన విషయాలను చర్చించుకోవాల్సిన అవసరం వుండదు. తమకు అనుగుణంగా వుండే ఉద్యోగాలను చేసుకుంటూ.. ఆర్థికంగా ఒకరికొకరు స్వతంత్ర్యంగా వుండొచ్చు. 

కొంతమందైతే కలిసి జీవించడానికి ఎక్కువమొగ్గు చూపుతారు. మరికొంతమంది ఒకే వ్యక్తితో జీవితం గడపడానికి విసుగు చెందుతారు. అటువంటి సమయాల్లో మీ భాగస్వామిని మార్చాలనుకుంటే లివిన్ రిలేషన్ అందుకు ఎంతో అనుగుణంగా వుంటుంది. 

లివిన్ రిలేషన్ లో తెగతెంపులు చేసుకోవడం చాలా సులభం. వివాహబంధంలా ఇందులో ముందుగానే చట్టపరమైన బాధ్యతలు పాటించాల్సిన అవసరం వుండదు. మీమధ్య భావోద్వేగాలు ఏర్పడుతున్నాయనే సందేహం కలిగిన విడిపోవచ్చు. 

లివిన్ రిలేషన్ లో మీరు మీ భాగస్వామికోసం మీ స్వభావాలను మార్చుకోవాల్సిన అవసరం వుండదు. వారికోసం మీకు నచ్చిన వాటిని త్యాగం చేయడం, లేదా వారి మార్గంలో నడవడం వంటిని అవసరం వుండదు. 

అత్యంత ముఖ్యమైన విషయం ఏమిటంటే.. లివిన్ రిలేషన్ లో విడాకులు లేకపోవడం. ఇటువంటి జంటలు తమకు ఎప్పుడు కావాలంటే అప్పుడు ఎవరి ఆధిపత్యం లేకుండా, విడాకులు అనే చట్టాన్ని పాటించకుండా స్వేచ్ఛగా విడిపోవచ్చు. 

ఇలా ఈ విధంగా నేటితరంలో వున్న యువతీయువకులు లివిన్ రిలేషన్ గురించి తమ భావాలను వ్యక్తపరుస్తున్నారు.