నా కూతురు గోప్ప పుట్టిన రోజు కానుక ఇది: విజయ

Posted: 08/26/2019 03:38 PM IST

వరల్డ్ ఛాంపియన్‌షిప్‌లో పసిడి పతకం గెలుపొందిన తొలి భారత షట్లర్‌గా పీవీ సింధు ఘనత సాధించడంతో ఆమె తల్లి విజయ భావోద్వేగానికి లోనయ్యారు. స్విట్జర్లాండ్‌లోని బాసెల్ వేదికగా ఆదివారం జరిగిన ఫైనల్ మ్యాచ్‌లో జపాన్ షట్లర్ ఒకుహరాపై 21-7, 21-7 తేడాతో వరుస సెట్లలో పీవీ సింధు గెలుపొందిన విషయం తెలిసిందే. 2017, 2018లో వరుసగా ఫైనల్లో ఓడిన పీవీ సింధు.. ఈసారి స్వర్ణం గెలవాలని తాము ఆశించినట్లు చెప్పుకొచ్చిన విజయ.. తన పుట్టిన రోజుకి కూతురు గొప్ప బహుమతి ఇచ్చిందని ఆనందం వ్యక్తం చేశారు. ఆదివారమే విజయ పుట్టినరోజు కావడంతో.. పీవీ సింధు కూడా పసిడి పతకాన్ని తన తల్లికి అంకితం చేస్తున్నట్లు ప్రకటించింది.

‘ఈ గొప్ప క్షణాల కోసం మేము సుదీర్ఘకాలంగా ఎదురుచూస్తున్నాము. పీవీ సింధు పసిడి పతకం గెలవడం చాలా గర్వంగా ఉంది. నా పుట్టిన రోజుకి గొప్ప బహుమతిని అందించింది’ అని విజయ ఆనందం వ్యక్తం చేశారు. ఫైనల్ మ్యాచ్‌ తర్వాత పీవీ సింధు మాట్లాడుతూ ‘వరుసగా 2017, 2018 ఫైనల్లో నేను ఓడిపోయా. అందుకే ఈ ఏడాది ఫైనల్లో గెలవడం నాకు చాలా ముఖ్యం. ఇక్కడ నాకు మద్దతుగా నిలిచిన అభిమానులకి థ్యాంక్స్. ఈరోజు మా అమ్మ పుట్టినరోజు.. అందుకే ఈ పసిడి పతకాన్ని ఆమెకి అంకితం చేస్తున్నా’ అని ప్రకటించింది.

Am so lucky to capture this moment. #sindhu speaks to her family for the first time after winning the #BadmintonWorldChampionships. #PVSindhu pic.twitter.com/O1DHsnhVYs

— krishnamurthy (@krishna0302) August 25, 2019