చెస్ గేమ్ లో కాంస్యం గెలుచుకున్న తెలుగమ్మాయి!

Posted: 09/16/2014 12:11 PM IST

తెలంగాణ రాష్ట్ర చెస్ క్రీడాకారిణి అయిన హిందూజ రెడ్డి.. జాతీయ మహిళ ఛాలెంజర్స్ ‘బి’ ఛాంపియన్ షిప్ లో కాంస్య పతకాన్ని సాధించింది. గోవాలో సోమవారం ముగిసిన ఈ టోర్నీలో.. నిర్ణీత 11 రౌండ్ల తర్వాత హిందూజ 8.5 పాయింట్లతో మూడో స్థానంలో నిలిచి కాంస్య పతకం స్వాధీనం చేసుకుంది. విజయకెరటానికి దరిదాపులదాకా వెళ్లి వచ్చిన ఈ తెలుగమ్మాయి... టైటిల్ కోసం చాలానే కష్టపడింది. అయితే చివరి నిముషంలో కేవలం కాంస్యంతోనే సరిపెట్టుకోవాల్సి వచ్చింది. అయితే.. అంతవరకు గెలిచి రావడం కూడా అంత సామాన్య విషయం కాదని పేర్కొంటున్నారు నిపుణులు!

హిందూజ మొత్తం ఎనిమిది గేముల్లో గెలిచి, ఒక గేమ్ ను డ్రాగా ముగించగా... మరో రెండింటిలో మాత్రం ఓడిపోయింది. చివరి రౌండ్ ల తెల్లపావులతో ఆడిన హిందూజ... 64 ఎత్తులో ఏజీ నిమ్మీపై విజయం సాధించింది. ఈ టోర్నీలో ఒక్కొక్కరు ఒక్కొక్క విధంగా తమ ప్రతిభను కనబరిచి అందరినీ బాగానే ఆకట్టుకున్నారు. ఆంధ్రప్రదేశ్ కు చెందిన బొడ్డ ప్రత్యూష 8 పాయింట్లతో ఏడో స్థానంలో, లక్ష్మీప్రణీత 7.5 పాయింట్లతో తొమ్మిదో స్థానంలో, జి.లాస్య 7.5 పాయింట్లతో 13వ స్థానంలో నిలిచారు. తొమ్మిది మంది క్రీడాకారిణులు 7.5 పాయింట్లు సాధించగా... మెరుగైన టైబ్రేక్ స్కోరు ఆధారంగా తుది ర్యాంక్‌లను ఖరారు చేశారు.

ఈ టోర్నీలో నిషా మొహతా (పీఎస్‌పీబీ), విజయలక్ష్మి (ఎయిరిండియా) 9.5 పాయింట్లతో ఉమ్మడిగా అగ్రస్థానంలో నిలిచారు. అయితే మెరుగైన టైబ్రేక్ స్కోరు ఆధారంగా నిషా మొహతాకు టైటిల్ లభించింది. విజయలక్ష్మీ రన్నరప్‌గా నిలిచింది. ఏదిఏమైనా.. గేమ్ చివరిదాకా పోరాటం సాగించి, కాంస్యం సాధించినందుకు హిందూజారెడ్డి సంతోషాన్ని వ్యక్తం చేస్తోంది.

AS