‘‘క్రికెట్ లోకి ఐదో అంఫైర్.. విండీస్ సిరీస్ తోనే మొదలు’’

Posted: 11/25/2019 08:24 PM IST

Tv umpire no ball trials from india west indies series

భారత్, వెస్టిండీస్ మధ్య డిసెంబరు 6 నుంచి ప్రారంభంకానున్న సిరీస్‌‌లో నోబాల్‌ని గుర్తించేందుకు ప్రయోగాత్మకంగా టీవీ అంపైర్‌‌ని ఐసీసీ నియమించబోతున్నట్లు వార్తలు వస్తున్నాయి. ఆస్ట్రేలియా, పాకిస్థాన్ మధ్య ఆదివారం ముగిసిన తొలి టెస్టు మ్యాచ్‌లో పాకిస్థాన్ బౌలర్లు దాదాపు 21 నోబాల్స్ విసిరినా.. ఫీల్డ్ అంపైర్లు పసిగట్టలేకపోవడంపై అభిమానులు తీవ్ర స్థాయిలో మండిపడుతున్నారు. దీంతో.. నోబాల్స్‌ని గురించేందుకు ఒక టీవీ అంపైర్‌ని నియమించాలనే ప్రతిపాదనని మళ్లీ ఐసీసీ తెరపైకి తీసుకొచ్చినట్లు తెలుస్తోంది.

ఈ ఏడాది ఆరంభం నుంచి ఫీల్డ్ అంపైర్ల తీరుపై విమర్శలు పెరుగుతున్నాయి. ముఖ్యంగా ఐపీఎల్ 2019 సీజన్ సమయంలో నోబాల్స్‌ని గుర్తించడంలో అంపైర్లు ఘోరంగా విఫలమయ్యారు. దీంతో.. ముంబయితో జరిగిన ఓ మ్యాచ్‌లో బెంగళూరు మ్యాచ్‌ని చేజార్చుకోవాల్సి వచ్చింది. మరో మ్యాచ్‌లో ధోనీ ఏకంగా మైదానంలోకి వెళ్లి ఫీల్డ్ అంపైర్లతో గొడవకి దిగాడు. మొత్తంగా చూసుకుంటే ఇటీవల నోబాల్స్‌ని గుర్తించడంలో ఫీల్డ్ అంపైర్లు విఫలమవుతున్నారనేది నిజం. దీంతో.. ఐసీసీ దిద్దుబాటు చర్యలకి దిగింది.

ఫీల్డ్ అంపైర్లతో సంబంధం లేకుండా.. ఒక టీవీ అంపైర్ స్టేడియంలో ఉంటాడు. అతడి పని కేవలం నోబాల్స్‌ని గుర్తించడమే. ఇప్పటి వరకూ ఔట్ నిర్ణయం విషయంలో ఏవైనా సందేహాలుంటే మైదానంలోని ఇద్దరు ఫీల్డ్ అంపైర్లు.. స్టేడియంలోని థర్డ్ అంపైర్‌‌కి నివేదించేవారు. ఇక ఫోర్త్ అంపైర్ మైదానం వెలుపల నుంచి మ్యాచ్‌ని పర్యవేక్షించేవాడు. అతని విధి.. కొత్త బంతుల్ని, వాటర్ బాటిల్స్‌ని ఫీల్డ్ అంపైర్లకి అందించడం. తాజాగా టీవీ అంపైర్‌ కూడా వారితో చేరనున్నాడు. దీంతో.. మొత్తంగా ఐదుగురు అంపైర్లు మ్యాచ్‌ని పర్యవేక్షించనున్నారు.