ఐసీసీ వన్డే ర్యాంకింగ్స్ లో అధిపత్యం చాటిన టీమిండియా

Posted: 11/12/2019 08:08 PM IST

Icc odi rankings 2019 virat kohli jasprit bumrah retain top spots in icc batting and bowling rankings

అంతర్జాతీయ క్రికెట్‌ మండలి (ఐసీసీ) తాజాగా విడుదల చేసిన వన్డే ర్యాంకింగ్స్ లో టీమిండియా ఆటగాళ్లు టాప్ ప్లేస్ ను ఆక్రమించుకున్నారు. ఇవాళ ఐసీసీ తాజా వన్డే ర్యాంకింగ్స్ ను విడుదల చేసింది. ఇందులో టీమిండియా కెప్టెన్ విరాట్‌ కోహ్లీతో పాటు పేస్‌ గుర్రం జస్ప్రీత్‌ బుమ్రా అగ్రస్థానాలలో కొనసాగుతున్నారు. బ్యాటింగ్ లో 895 రేటింగ్‌ పాయింట్లతో కోహ్లీ అగ్రస్థానంలో నిలువగా, ఆ తరువాత రెండో స్థానంలో వైస్ కెప్టెన్, భారత ఓపెనర్ రోహిత్‌ శర్మ (863) రెండో స్థానంలో కొనసాగుతున్నాడు.

ఇటు బౌలింగ్ విభాగంలోనూ భారత జట్టు అటగాడు టాప్ లో నిలిచాడు. డెత్ ఓవర్ స్పెషలిస్ట్, పేస్ గుర్రం జస్ప్రీత్ బుమ్రా (797) మినహా ఎవరూ టాప్‌-10లో చోటు దక్కించుకోలేకపోయారు. న్యూజిలాండ్‌ బౌలర్‌ ట్రెంట్‌ బౌల్ట్‌ 740 పాయింట్లతో రెండో స్థానంలో ఉన్నాడు. ఆల్‌రౌండ్‌ ర్యాంకింగ్స్‌లో భారత ఆటగాడు హార్దిక్‌ పాండ్య పదో స్థానంలో నిలిచాడు. టీమ్‌ ర్యాంకింగ్స్‌లో భారత్‌ (122) రెండో స్థానంలో కొనసాగుతోంది.

ప్రపంచ కప్‌ విజేత ఇంగ్లాండ్‌ (125) అగ్రస్థానంలో నిలిచింది. సుదీర్ఘ ఫార్మాట్లో మొదటి స్థానంలో ఉన్న భారత్ టీ20ల్లో ఐదో స్థానంలో కొనసాగుతోంది. రెండు టెస్టుల సిరీస్ లో భాగంగా భారత్‌×బంగ్లాదేశ్‌ మధ్య తొలి టెస్టు నవంబర్‌ 14న ప్రారంభం కానుంది. ఇటీవల బంగ్లాతో జరిగిన మూడు టీ20ల సిరీస్‌ను రోహిత్ సేన 2-1తో కైవసం చేసుకున్న సంగతి తెలిసిందే. దీంతో ఇక టెస్టు క్రికెట్ లోనూ బంగ్లాపై తమ అధిపత్యాన్ని కనబర్చాలని రోహిత్ సేన ఉవ్విళ్లూరుతొంది.