దక్షిణాఫ్రికా పేసర్ రబాడాను ట్రోల్ చేసిన కోహ్లీ

Posted: 10/11/2019 06:05 PM IST

దక్షిణాఫ్రికాతో జరుగుతున్న రెండో టెస్టు తొలి ఇన్నింగ్స్‌లో టీమిండియా సారథి విరాట్‌ కోహ్లీ అద్భుత శతకం బాదేశాడు. టెస్టుల్లో 26వ శతకం అందుకున్నాడు. అన్ని ఫార్మాట్లలో కలిపి అతడికిది 69వ సెంచరీ కావడం గమనార్హం. మ్యాచ్‌లో రెండో రోజు ఆటంతా విరాట్‌దే. అతనాడిన కవర్‌డ్రైవ్‌లు చూడముచ్చటగా అనిపించాయి. తనట్రేడ్‌ మార్క్‌ షాట్లతో చెత్త బంతులను బౌండరీకి తరలించాడు.

మంచి లయలో ఉన్న అతడు ద్విశతకం చేసినా ఆశ్చర్యం లేదు. తొలిరోజు కోహ్లీ దక్షిణాఫ్రికా ఫీల్డర్లను ఆటపట్టించిన సరదా సన్నివేశం ఒకటి శుక్రవారం వైరల్‌గా మారింది. మొదటి రోజు 66వ ఓవర్‌లో బ్యాటింగ్‌ చేస్తున్న విరాట్‌ బంతిని పాయింట్లో ఫీల్డింగ్‌ చేస్తున్న రబాడ కుడివైపునకు ఆడాడు. త్వరిత పరుగు కోసం ప్రయత్నించాడు. అయితే పరుగెత్తుకుంటూ వచ్చిన రబాడ బంతిని వంగి అందుకొని వికెట్ల వైపు విసిరాడు.

అది వికెట్లకు ఆమడ దూరం నుంచి బౌండరీ సరిహద్దుకు చేరుకుంది. అదనంగా నాలుగు పరుగులు లభించిన తర్వాత కోహ్లీ దక్షిణాఫ్రికా ఆటగాళ్లను ఆటపట్టిస్తూ థమ్స్‌అప్‌ చిహ్నం వారికి చూపించాడు. చురకత్తుల్లాంటి బంతులు సంధించే రబాడతో విరాట్‌కు అనధికార పోటీ ఉన్న సంగతి తెలిసిందే. 127 ఓవర్లు ముగిసే సరికి కోహ్లీ 152 పరుగులతో అజేయంగా ఉన్నాడు.