అంఫైర్ ఫెయిల్: 12 నోబాల్స్ వేసిన లంక స్పిన్నర్

Posted: 11/26/2018 08:14 PM IST

కొలంబో వేదికగా ఇంగ్లాండ్‌ తో ముగిసిన మూడో టెస్టు మ్యాచులో శ్రీలంక స్పిన్నర్ లక్షణ్ సందకన్ బౌలింగ్‌ చర్చనీయాంశంగా మారింది. ఈ మ్యాచులో 42 పరుగుల తేడాతో గెలుపొందిన ఇంగ్లాండ్ జట్టు మూడు టెస్టుల సిరీస్‌ని 3-0తో చేజిక్కించుకోగా.. ఆతిథ్య శ్రీలంక నోబాల్స్ కారణంగా అభాసుపాలైంది.
ఆటలో నాలుగో రోజైన సోమవారం తొలి సెషన్‌లో ఐదు ఓవర్లు బౌలింగ్ చేసిన సందకన్.. ఏకంగా 12 బంతుల్ని నోబాల్‌గా విసిరాడు.

అయితే.. ఇందులో కేవలం రెండు బంతుల్ని మాత్రమే అంపైర్లు నోబాల్‌గా గుర్తించారు. ఈ రెండు బంతుల్లోనూ ఒక బంతికి ఇంగ్లాండ్ ఆల్‌రౌండర్ బెన్‌స్టోక్స్ ఔటయ్యాడు. సందకన్ బౌలింగ్ తీరుపై అసహనం వ్యక్తం చేసిన శ్రీలంక కెప్టెన్ లక్ష్మల్.. అతనితో పలుమార్లు చర్చలు జరిపినా ఫలితం లేకపోయింది. మొత్తంగా ఇవాళ్టి తొలి సెషన్లో సందకన్ వేసిన ఐదు ఓవర్లని పరిశీలించిన ‘మ్యాచ్ ప్రసార ఛానల్’ 40% బంతులు నోబాల్స్ అని గుర్తించింది.

మొత్తంగా ఆయన వేసిన ఐదు ఓవర్లలో.. 12 బంతుల్ని అతను నోబాల్ గా వేసినట్లుగా వెలుగులోకి తెచ్చింది. ఇందులో రెండు బంతులు అంటే.. 6% మాత్రమే అంపైర్లు గుర్తించగలిగారు. ఇప్పుడు సోషల్ మీడియాలో ఈ నోబాల్స్‌పై పెద్ద ఎత్తున చర్చ నడుస్తోంది. కొలంబో వేదికగా శుక్రవారం ఆరంభమైన ఈ టెస్టులో టాస్ గెలిచి మొదట బ్యాటింగ్ చేసిన ఇంగ్లాండ్ జట్టు బెయిర్‌స్టో (110: 186 బంతుల్లో 9x4, 1x6) శతకం బాదడంతో తొలి ఇన్నింగ్స్‌లో 336 పరుగులు చేసింది.

అనంతరం మొదటి ఇన్నింగ్స్ ఆరంభించిన శ్రీలంక జట్టు 240 పరుగులకే కుప్పకూలిపోగా.. ఇంగ్లాండ్‌కి 96 పరుగుల తొలి ఇన్నింగ్స్ లభించింది. అనంతరం రెండో ఇన్నింగ్స్‌‌లో ఇంగ్లాండ్ జట్టు 230 పరుగులకి ఆలౌటవగా.. శ్రీలంక ముందు 327 పరుగుల లక్ష్యం నిలిచింది. అయితే.. ఈ భారీ లక్ష్య ఛేదనని 82/5తో పేలవ రీతిలో ఆరంభించిన లంక.. ఏ దశలోనూ విజయం దిశగా సాగలేకపోయింది. ఆఖరికి ఆ జట్టు 284 పరుగులకి ఆలౌటైంది.