అప్ఘన్ టెస్టుకు ఇషాంత్ శర్మ అనుమానామే.?

Posted: 06/05/2018 06:42 PM IST

ఐపీఎల్‌ వేలంలో టీమిండియా అటగాడు ఇషాంత్‌ శర్మకు చేధు అనుభవం ఎదురుకావడంతో అతను తానేంటో.. తన సత్తా ఏంటో అన్నది ఏకంగా కౌంటీ క్రికెట్‌ లో నిరూపించుకున్న ఆయనకు చారిత్రాత్మక టెస్టు మ్యాచ్ నుంచి తప్పుకోవాల్సిన పరిస్థితి ఏర్పడింది. ఐపీఎల్ లో తనను పక్కనబెట్టడంతో కౌంటీ క్రికెట్ ఆడేందుకు ఇంగ్లాండ్‌ వెళ్లిన ఇషాంత్.. అక్కడ ససెక్స్‌ జట్టు తరఫున ఆడుతూ గాయాల బారిన పడ్డాడు. దీంతో త్వరలో అఫ్గానిస్థాన్‌తో జరిగే ఏకైక టెస్టుకు ఇషాంత్‌ దూరమయ్యే అవకాశాలు కనిపిస్తున్నాయి.

ఇప్పటికే ఐపీఎల్ లో కుడి చేతి వేలికి గాయం కావడంతో వికెట్‌ కీపర్‌ సాహా ఈ టెస్టుకు దూరమయ్యాడు. అతని స్థానంలో దినేశ్‌ కార్తీక్ ను తీసుకుంది జట్టు యాజమాన్యం. ఇప్పుడు ఇషాంత్‌ శర్మపై అనుమానాలు నెలకొన్నాయి. తాజాగా అతడు గాయం కారణంగా ఎసెక్స్ తో మ్యాచ్ కు దూరమయ్యాడు. ఇషాంత్ విషయంలో ఇలా జరగడం ఇది రెండోసారి. భుజం గాయం కారణంగా ఇంతకు ముందు మిడిలెక్స్ తో మ్యాచ్ కు ఇషాంత్‌ దూరం కావాల్సి వచ్చింది. నాలుగు ఫస్ట్ క్లాస్‌ మ్యాచ్లు ఆడిన ఇషాంత్‌ 15 వికెట్లను దక్కించుకున్నాడు.

ఇక రాయల్‌ లండన్‌ తరఫున వన్డే కప్‌లో 6 మ్యాచ్‌లాడిన అతడు 8 వికెట్లను తన ఖాతాలో వేసుకున్నాడు. జూన్‌ 14న భారత్‌-అఫ్గానిస్థాన్‌ మధ్య బెంగళూరులో జరగనున్న ఏకైక టెస్టుకు జట్టు యాజమాన్యం అతన్ని ఎంపిక చేసింది. మరో వారం రోజులు మాత్రమే మిగిలివున్న నేపథ్యంలో ఇషాంత్.. ఇంగ్లాండ్‌ నుంచి భారత్‌ చేరుకోవాల్సి ఉంది. అంతేకాదు అఫ్గానిస్థాన్‌ టెస్టు కోసం బీసీసీఐ ఎంపిక చేసిన భారత జట్టు బృందం త్వరలో యో యో టెస్టులో కూడా పాల్గొనాల్సి ఉంది. ఈ టెస్టులో వచ్చిన ఫలితం ఆధారంగానే ఇషాంత్‌ ఆడతాడో? లేదో? తేలనుంది.