కోహ్లీ, నెహ్రాల గుట్టును రట్టు చేసిన మాజీ వైస్ కెప్టెన్

Posted: 09/12/2016 08:16 PM IST

ప్రపంచంలో అత్యంత ధనికులైన క్రికెటర్లలో టీమిండియా టెస్ట్ కెప్టెన్ విరాట్ కోహ్లీ ఒకడు. కానీ.. అంతా కలిసి ఎక్కడైనా పార్టీకి వెళ్లారో, అసలు జేబులోంచి డబ్బులు తీయడం అంటే మనోడికి మహా కష్టమట. ఈ విషయం చెప్పింది కూడా వాళ్లూ వీళ్లూ కారు.. సాక్షాత్తు జట్టు సీనియర్ సభ్యుడు యువరాజ్ సింగ్!! ఒక రేడియో చానల్‌కు ఇచ్చిన ఇంటర్వ్యూలో యువీ మాట్లాడుతూ కోహ్లీ పిసినారితనాన్ని బయటపెట్టాడు. తామంతా ఎప్పుడు కలిసి వెళ్లినా.. తానే డబ్బులు ఇవ్వాల్సి వస్తుందని, ఎప్పుడైనా కోహ్లీతో డబ్బులు ఇప్పించాలంటే అతడిని చాలా బలవంతం చేయాల్సి ఉంటుందని అన్నాడు.

ఇక జట్టులో ఉన్న మరో పిసినారి.. ఆశిష్ నెహ్రా అట. చాలా కాలం తర్వాత మళ్లీ జట్టులోకి వచ్చి మెరుపులు మెరిపించిన ఈ సీనియర్ బౌలర్ కూడా డబ్బులు తీయమంటే మహా బాధపడిపోతాడని యువరాజ్ అంటున్నాడు. ఏమైనా అంటే.. తనకు పెళ్లాం పిల్లలు ఉన్నారని, అందువల్ల ఎక్కువ ఖర్చుపెట్టలేనని బీద అరుపులు అరుస్తాడట. వీళ్లిద్దరితో పాటు ఇంకా చాలామంది టీమిండియా క్రికెటర్లకు జేబులోంచి డబ్బులు తీయడం అంటే బాగా ఇబ్బందిగానే ఉంటుందని, అయితే అందరి పేర్లూ బయట పెట్టడం బాగోదని చెప్పాడు. కోహ్లీ, నెహ్రాలతో ఉన్న సాన్నిహిత్యం దృష్ట్యా వాళ్లిద్దరి గురించి మాత్రం కాస్తంత ఎక్కువగా చెప్పినట్లున్నాడు.