ఆ ‘హోదా’ కోసం ధోనీ పన్నుతున్న సరికొత్త వ్యూహం?

Posted: 07/24/2015 03:02 PM IST

రొటీన్ కి భిన్నంగా ఏదైనా కొత్తగా చేస్తే దాని మజాయే వేరుగా వుంటుందని కొందరు వ్యక్తులు చెబుతుంటారు. టీమిండియా కెప్టెన్ మహేంద్రసింగ్ ధోనీ ఈ విధానాన్ని నిత్యం పాటిస్తూ వుంటాడు. కేవలం క్రికెటర్ గానే కాకుండా ఇతర రంగాలలోనూ పాలుపంచుకుంటుంటాడు. ఇతరుల కంటే ఒక మెట్టు ఎత్తులో వుండాలని ఆశిస్తుంటాడు. అయితే.. అందుకోసం మనోడు ఏ తొందరపాటు వ్యవహారాలు నిర్వహించడు. ఆ సమయం వచ్చినప్పుడు అది తనకు అనుకూలంగా వుంటుందో లేదో విశ్లేషించి, అప్పుడు అడుగు పెడతాడు. అటువంటి అవకాశం మరొకటి ఇతని గుమ్మంలో వచ్చిపడింది. దానికోసమే ధోనీ సరికొత్త వ్యూహం రచిస్తున్నాడని వార్తలొస్తున్నాయి.

పూర్తి వివరాల్లోకి వెళ్తే.. మ్యాచ్ ఫిక్సింగ్ ఆరోపణలతో చెన్నైతోపాటు రాజస్థాన్ జట్లపై జస్టిస్ లోధా కమిటీ రెండేళ్లపాటు నిషేధం విధించిన విషయం తెలిసిందే! దీంతో వచ్చే సీజన్ లో ధోనీ ఆడే విషయం ప్రశ్నార్థకంగా మారింది. ఆటకు దూరంగా వుండటమే ఇష్టపడని ధోనీ.. తన జట్టు ఇలా నిషేధింపబడటంపై చాలా నిరాశలో మునిగిపోయినట్లు సమాచారం. అయితే.. ఈ క్రమంలోనే ఆసక్తికరమైన విషయం వెల్లడయ్యింది. అదేమిటంటే.. బీసీసీఐ ఇచ్చిన నివేదికలో ‘యాజమాన్యాలు మారితే.. ఆ రెండు జట్లను ఐపీఎల్ లో కొనసాగించవచ్చు’ అని జస్టిస్ లోధా పేర్కొన్నారు. ఈ విషయం తెలుసుకున్న ధోనీ మెదడులో ఒక బల్పు వెలిగింది. వచ్చే సీజన్ ఎలాగైనా ఆడాల్సిందేనని దాదాపుగా నిర్ణయించుకున్న ధోనీ.. ఆ దిశగా తనదైన శైలిలో ప్రణాళికలు చేపడుతున్నాడు.

ధోనీ ఆలోచన ఏమిటంటే.. నిన్నటిదాకా తన కెప్టెన్సీలో ఆడిన చెన్నై జట్టును ఏకంగా కొనుగోలు చేయాలని అతడు తలపోస్తున్నాడట. జస్టిస్ లోధా ఇచ్చిన సింగిల్ అవకాశాన్ని తనకు అనుకూలంగా మార్చుకునేందుకు సన్నాహాలు చేస్తున్నాడని సమాచారం. ఈ విషయం ఇంకా అధికారికంగా వెల్లడి కాలేదు కానీ ఒకవేళ నిజమైతే మాత్రం.. తన నాయకత్వంలో జట్టుకు కెప్టెన్ గానూ వ్యవహరించే అవకాశం మనోడి చేతికి దొరికినట్లే!