టీమిండియాకు కోచ్ గా గంగూలీనే బెస్ట్ : లిటిల్ మాస్టర్

Posted: 05/19/2015 10:28 AM IST

టీమిండియా జట్టుకు సరైన కొత్త కోచ్ కోసం బీసీసీఐ గతకొన్నాళ్ల నుంచి కసరత్తు చేస్తూ వస్తోంది. ఈ పదవికి గంగూలీ సహా మరికొంతమంది ప్రముఖుల పేర్లు వినిపిస్తున్నాయి. అయితే.. ప్రస్తుతమున్న జట్టుకు ఎంతో అనుభవమున్న ఆటగాడు కోచ్ గా నియమితులైతే ఎంతో ఉపయోగపడుతుందని కొందరు అంటున్నారు. ముఖ్యంగా గంగూలీ కోచ్ గా నియమితులైతే బాగుంటుందని చెబుతున్నారు. ఎందుకంటే.. గంగూలీ చాలా అనుభవం కలిగిన ఆటగాడని, ప్రస్తుత జట్టుకు అతడు కోచ్ గా వ్యవహరిస్తే చాలా ప్రయోజనాలు కలుగుతాయని అభిప్రాయం వ్యక్తం చేస్తున్నారు. ఈ క్రమంలోనే అలనాటి మేటిదిగ్గజం లిటిల్ మాస్టర్ సునీల్ గవాస్కర్ కూడా ఇదే అభిప్రాయాన్ని వెల్లడించాడు.

ఈ క్రమంలోనే గవాస్కర్ మాట్లాడుతూ.. టీమిండియా కోచ్ గా సౌరవ్ గంగూలీ మెరుగ్గా రాణించే అవకాశాలున్నాయని అన్నారు. గంగూలీ అనుభవం ప్రస్తుతం జట్టుకు ఎంతో ఉపయోగపడుతుందని పేర్కొన్నాడు. భారత జట్టు హెడ్ కోచ్గా లేదా టీమ్ డైరెక్టర్గా ఏ పదవిలో నియమించినా గంగూలీ పూర్తి న్యాయం చేస్తాడని అభిప్రాయపడ్డాడు. ‘భారత్ ఆడబోయే మ్యాచ్లు ఎక్కువగా స్వదేశంలో, ఉపఖండంలో ఉన్నాయి. టీమిండియా కోచ్ బాధ్యతలు చేపట్టేందుకు ఇదే సరైన సమయం. ఈ పదవిలో గంగూలీని నియమిస్తే జట్టును సమర్థవంతంగా నడిపిస్తాడు. దాదా కోచ్ అయితే జట్టుకు ఇతర కోచ్ల అవసరం ఉండదు’ అని గవాస్కర్ ఓ ఇంటర్వ్యూ సందర్భంగా తన అభిప్రాయం వ్యక్తపరిచాడు.

ఇదిలావుండగా.. టీమిండియా కోచ్ పదవికి కొన్నిరోజుల నుంచి గంగూలీ పేరు వినిపిస్తున్నప్పటికీ ఆయన మాత్రం దీనిపై తన అభిప్రాయాన్ని ఇంతవరకు వెల్లడించలేదు. అతనితోపాటు మరికొందరు ఈ కోచ్ బరిలో వున్న నేపథ్యంలో దాదా సైలెంట్ గా వుండవచ్చునని అనుకుంటున్నారు.