ధోణి పుస్తకంలో ఉద్విగ్ధ భరిత క్షణాలు.. ఆనందబాష్పాలు..

Posted: 02/05/2015 07:00 PM IST

2011లో ఐసీసీ ప్రపంచ కప్ గెలిచిన ఆ ఉద్విగ్ధ భరిత క్షణాల్లో భారత క్రికెట్ దిగ్గజాలు కన్నీరు పెట్టారట. భారత సారథి మహేంద్ర సింగ్ ధోనీ, మాస్టర్ బ్లాస్టర్ సచిన్ టెండుల్కర్ సహా భారత జట్టు సభ్యులు అందరు కంటతడి పెట్టారట. అయితే ఇవి నిజమైన కన్నీరు కాదు.. ఆనందంతో వచ్చిన కన్నీటీ బాష్పాలని స్వయంగా టీమిండియా కెప్టెన్ ధోనీ ఓ పుస్తకంలో తాజాగా చెప్పారు. 2011 ప్రపంచ కప్ కోసం భారత్ ఫైనల్ మ్యాచ్‌ను శ్రీలంకతో ఆడింది. ముంబై వాంఖేడే స్టేడియంలో ఏప్రిల్ 2, 2011న జరిగింది. ఈ విజయంపై ధోని ఓ పుస్తకంలో రాశాడు. ప్రపంచ కప్ గెలిచిన తర్వాత తాము ఏడుస్తామని ఎప్పుడూ అనుకోలేదని కూడా ఆ పుస్తకంలో రాశాడు.

డ్రెస్సింగ్ రూంలో ప్రతి ఒక్కరు ఏడ్చారు. అందరు అంటే ప్రతి ఒక్క జట్టు సభ్యుడు. మొత్తం 15 మంది ఆటగాళ్లు, స్టాఫ్, జట్టుతో సంబంధం కలిగిన ప్రతి ఒక్కరు కంటతడి పెట్టార'ని ధోనీ చెప్పాడు. ప్రపంచ కప్ గెలిచిన ఆనందంలో తాను ఏడుస్తానని ఎప్పుడు ఊహించలేదన్నాడు. 'గెలిచాక ఏడుస్తానని నేను ఎప్పుడు ఊహించలేదు. కానీ అది జరిగింది. ప్రపంచ కప్ గెలిచాక తమ ఎమోషన్స్‌ను ఈ ప్రపంచం చూడలేదు. ఎందుకంటే అందుకు సంబంధించిన ఫుటేజ్ లేద'ని పేర్కొన్నాడు. కాగా 2015 ప్రపంచ కప్‌కు ఫెంటాస్టిక్ గైడ్‌తో వెళ్తున్నామని కప్ ను నిలబెట్టుకునేందుకు టీమిండియా శయశక్తులా కృషి చేస్తుందని అన్నారు.

జి.మనోహర్