విఫలమైన పాత హీరోలు

Posted: 11/11/2013 12:55 PM IST

మరోసారి విఫలమైన మన పాత హీరోలు. భారత జట్టులో చోటుకోసం తీవ్రంగా శ్రమిస్తున్న ఢిల్లీ జోడీ వీరేంద్ర సెహ్వాగ్‌, గౌతం గంభీర్‌ మరోసారి పేలవమైన ఆటతీరును ప్రదర్శించారు. రంజీ ట్రోఫీలో భాగంగా గుజరాత్‌తో జరుగుతున్న మ్యాచ్‌లో వీరు అంచనాల మేరకు రాణించలేక పోయారు. రెండవ ఇన్నింగ్స్‌లో 257 పరుగుల లక్ష్యంతో బరిలోకి దిగిన ఢిల్లీ జట్టు ఆట చివరిరోజు 32 ఓవర్లలో మూడు వికెట్ల నష్టానికి 100 పరుగులు మాత్రమే చేసింది.

 

గుజరాత్‌ స్పిన్నర్ల త్రయం ఆకాష్‌ పటేల్‌ (29), జెసాల్‌ కారియా (32), రాకేష్‌ ధ్రువ్‌ (25) పరుగులతో రాణించడంతో పాటు ఢిల్లీ బ్యాట్స్‌మన్‌ను కట్టడి చేయడంలో విజయం సాధించారు. సెహ్వాగ్‌ (15), గంభీర్‌ (44) పరుగులు మాత్రమే చేశారు. దీంతో ఢిల్లీ జట్టుకు ఒకే ఒక పాయింట్‌ లభించింది. కాగా, తొలి ఇన్నింగ్స్‌లో 25 పరుగుల ఆధిక్యం సాధించిన గుజరాత్‌ జట్టుకు మూడు పాయింట్లు లభించాయి.