అన్ని ఫార్మాట్లకు సచిన్ గుడ్ బై

Posted: 10/10/2013 04:33 PM IST

   గత సంవత్సరాల నుండి క్రికెట్ దేవుడు, మాస్టర్ బ్లాస్టర్ సచిన్ రిటైర్మెంట్ పై వస్తున్న వార్తలకు, ఊహాగానాలకు తెర దించుతూ సంచలనాత్మకమైన ప్రకటన చేశాడు. గత రెండు దశాబ్దాలకు పైగా క్రికెట్ అభిమానుల్ని అలరిస్తూ, ప్రపంచ రికార్డుల్ని సొంతం చేసుకొని కోట్లాది మంది అభిమానాన్ని సంపాదించుకున్న ఇప్పటికే టి20, వన్డేలకు గుడ్ బై చెప్పిన విషయం తెలిసిందే. ఇక టెస్టులకు కూడా గుడ్ బై చెబుతున్నట్లు నేడు ప్రకటించాడు. త్వరలో మన దేశంలో విండీస్ తో జరగనున్న టెస్ట్ సిరీస్ తరువాత క్రికెట్ కి దూరంగా ఉంటానని చెప్పాడు.

   త్వరలో తాను ఆడబోయే చరిత్రాత్మక 200వ టెస్టు అనంతరం వైదొలగనున్నాడు. గతంలోనే సచిన్ విండీస్ సిరీస్ తరువాత తప్పుకోబోతున్నాడనే వార్తలు కూడా వచ్చాయి. కానీ వాటిని ఖండిస్తూ వచ్చిన సచిన్ సడెన్ గా ఈ నిర్ణయాన్ని వెల్లడించడంతో అందరు షాక్ కి గురయ్యారు. . సచిన్ రిటైర్మెంట్ తో అంతర్జాతీయ క్రికెట్లో ఓ శకం ముగియనుంది.

   ప్రపంచ క్రికెట్ చరిత్రలో అత్యుత్తమ బ్యాట్స్మన్ మాజీ గా మారబోతున్నాడు. తన కెరీర్ను పూర్తిగా ఆస్వాదించానని సంతృప్తి వ్యక్తం చేశాడు. తనకు అండగా నిలిచిన అభిమానులకు, సన్నిహితులకు కృతజ్ఞతలు తెలియజేశాడు. ఈ మేరకు బీసీసీఐ లేఖ రాశాడు.

   ఈ సందర్భంగా మీడియాతో మాట్లాడిన సచిన్ తాను భారత్ తరుపున క్రికెట్ ఆడటం తన జీవిత కాల స్వప్నం అని, కెరియర్ మొదలు పెట్టినప్పటి నుండి ప్రతి రోజు ఒకే కలతో బతుకుతున్నానని, 11 ఏళ్ళ వయస్సు నుండి క్రికెట్ ఆడుతున్నానని, ఇప్పుడు క్రికెట్ లేని జీవితాన్ని ఊహించుకోలేనని సచిన్ అన్నాడు. వన్డేల్లో 18,426 పరుగులు, టెస్టుల్లో 15,837 పరుగులు సాధించిన ఈయన 51 శతకాలు, 67 అర్థ శతకాలు సాధించాడు. వన్డేల్లో అత్యథికంగా 198 పరుగులు చేసి రికార్డు స్రుష్టించాడు. 200 వ టెస్టులో చివరిసారిగా కనిపించనున్న సచిన్ లేని క్రికెట్ ని ఊహించుకోవడం కాస్త కష్టమేనేమో ?