కోహ్లీసేన కుమ్మేసింది

Posted: 07/29/2013 11:17 AM IST

జింబాంబ్వే పర్యటనకు వెళ్లే ముందు భారత కుర్రాళ్ల పై చిన్న సందేహం గతంలో ట్రై సిరీస్ లో ఆ జట్టు పై ఓడి పోయి ఫైనల్ చేరకుండానే ఇంటి ముఖం పట్టిన టీంఇండియా ఈసారి ఏం చేస్తుందోనని. కానీ ఆ సందేహాల్ని పటా పంచలు చేస్తూ తొలి రెండు వన్డేల్లో నెగ్గిన కుర్రాళ్ళు మూడో వన్డేలో కూడా తన పూర్తి స్థాయి ప్రదర్శనతో ఘన విజయం సాధించి మరో రెండు వన్డేలు మిగిలి ఉండగానే సెల్ కాన్ మొబైల్ కప్ సిరీస్ ను తన ఖాతాలో వేసుకున్నారు. తొలి రెండు వన్డేల్లో ఉన్న లోపాలను సరిద్దిద్దుకొని మూడో వన్డేలో తిరుగులేని ఆధిపత్యం చలాయించారు. ఆదివారం హరారే స్పోర్ట్స్ క్లబ్ లో జరిగిన మూడో వన్డేలో భారత్ ఏడు వికెట్ల తేడాతో నెగ్గింది. ఈ విజయంతో ఐదు వన్డేల సిరీస్‌ను కోహ్లి సేన 3-0తో నెగ్గినట్టయ్యింది. ముందుగా బ్యాటింగ్ చేసిన జింబాబ్వే 46 ఓవర్లలో 183 పరుగులకు ఆలౌటయ్యింది. విలియమ్స్ (53 బంతుల్లో 45; 2 ఫోర్లు; 1 సిక్స్), మసకద్జా (53 బంతుల్లో 38; 5 ఫోర్లు) మాత్రమే రాణించారు. మిశ్రా తన  స్పిన్ మాయాజాలంతో నాలుగు వికెట్లు తీసి జింబాంబ్వేను దెబ్బతీశాడు. షమీకి రెండు వికెట్లు దక్కాయి. ఆ తర్వాత బరిలోకి దిగిన భారత్ 35.3 ఓవర్లలో మూడు వికెట్లు కోల్పోయి 187 పరుగులు చేసి నెగ్గింది. ధావన్ (32 బంతుల్లో 35; 5 ఫోర్లు), రాయుడు (54 బంతుల్లో 33; 2 ఫోర్లు) మెరుగ్గా ఆడగా చివర్లో రైనా (18 బంతుల్లో 28 నాటౌట్; 3 ఫోర్లు) బ్యాట్ ఝుళిపించాడు. మ్యాన్ ఆఫ్ ద మ్యాచ్ అవార్డు అమిత్ మిశ్రాకు దక్కింది. నాలుగో వన్డే ఆగస్టు 1న బులవాయోలో జరుగుతుంది.