ఢిల్లీ పై పంజా విసిరింది

Posted: 05/17/2013 11:54 AM IST

ఢిల్లీ డేర్ డెవిల్స్ కి ఈ సీజన్ లో అస్సలు కలిసి రావడం లేదు. అసలే అంతంత మాత్రం రాణిస్తూ, ఒకటి రెండు విజయాలు సాధించిన ఢిల్లీకి నిన్న రాత్రి పంజాబ్ తో జరిగిన మ్యాచ్ లో ఓటమి ఎదురైంది. చివరి వరకు ఉత్కంఠగా సాగిన ఈ మ్యాచ్ లో పంజాబ్ బౌలర్ల ధాటికి ఢిల్లీ చేతులెత్తేసింది. దీంతో 7 పరుగుల స్వల్ప తేడాతో ఓటమి పాలైంది.  ముందుగా బ్యాటింగ్ చేసిన పంజాబ్ నిర్ణీత 20 ఓవర్లలో కేవలం నాలుగు వికెట్లు మాత్రమే కోల్పోయి 171 పరుగుల భారీ స్కోరు సాధించింది. ఓపెనర్ గిల్‌క్రిస్ట్‌ (42), మార్ష్‌ (45) శుభారంభాన్నందించగా.. మిడిలార్డర్‌లో మిల్లర్‌ (44), సతీష్‌ (22) నిలకడగా ఆడి జట్టుకు భారీ స్కోరు అందించారు. తరువాత భారీ లక్ష్యాన్ని ఛేదించడానికి బరిలోకి దిగిన ఢిల్లీకి ఆది లోనే ఎదురు దెబ్బ తగిలింది.  జయవర్ధనేతో ఓపెనింగ్‌కు వచ్చిన ఉన్ముక్త్‌ మరోసారి 7 పరుగులకే పెవీలియన్‌కు చేరగా.. ఆ తర్వాత ఇర్ఫాన్‌ 1, వార్నర్‌ 0. వెంటవెంటనే పెవీలియన్‌కు చేరారు. ఈ క్రమంలో ఒంటిరి పోరాటం చేస్తున్న జయవర్ధనే వ్యక్తిగత 39 పరుగులు చేసి ఔటైన క్రమంలో రొహరెర్‌ (49), ఆఖరులో భారీ షాట్లు కొట్టి స్కోరును 164 వరకు తీసుకొచ్చి, గెలుపుపై ఆశలు రేకెత్తించినా చావ్లా దెబ్బ తీయడంలో విజయం ముంగిట బోల్తా కొట్టింది. దీంతో మరో ఓటమిని ఢిల్లీ మూటగట్టుకుంది.