ముంబై ఘన విజయం

Posted: 05/16/2013 11:20 AM IST

సొంత గడ్డ పై తమకు తిరుగులేదని నిరూపించుకుంది ముంబై జట్టు. ఈ సీజన్ లో అగ్రజట్లుగా చెలామణి అవుతున్న రాజస్థాన్ రాయల్స్, ముంబయి ఇండియన్స్ మధ్య హోరాహోరీగా సాగిన మ్యాచ్ లో చివరికి ముంబై పై చేయి సాధించింది. ఈ విజయంతో ముంబై అగ్ర స్థానంలో నిలిచింది. టాస్ గెలిచి ఫీల్డింగ్ ఎంచుకుంది రాజస్థాన్ జట్టు ముంబైని బ్యాటింగ్ కి ఆహ్వానించింది. ఆట ప్రారంభం నుండే ముంబై బ్యాట్స్ మెన్స్ తన జోరును కొనసాగించారు. ముంబై కొత్త ఓపెనర్లుగా బరిలోకి దిగిన తారే -మ్యాక్స్‌వెల్‌ ఇన్నింగ్స్‌ ప్రారంభించారు. మ్యాక్స్ వెల్ త్వరగానే వెనుదిరిగినా, తరువాత దినేష్ కార్తీక్ తో కలిసి తారే తన ప్రతాపాన్ని చూపించాడు. మొత్తం 37 బంతులు ఎదుర్కొని 8 ఫోర్లు, 1 సిక్స్‌ సాయంతో 59 (అర్ధ శతకం) పరుగులు సాధించి వెనుదిరిగాడు. కార్తిక్‌ (21) , శర్మ (14), పొలార్డ్‌ (17), హర్బజన్‌సింగ్‌ (15) రాణించి జట్టు స్కోరును 20 ఓవర్లలో 166కు చేర్చారు.

అనంతరం బ్యాటింగ్ ప్రారంభించిన రాజస్థాన్ రాయల్స్ ఆరంభంలో తడబడింది. ఓపెనర్లు ద్రవిడ్‌ (4), రహనే (4)తో పాటు ఫౌల్క్‌నర్‌ (12), సామ్‌సన్‌ (4).. ఇలా వరుసబెట్టి వికెట్లు కోల్పోవడంతో రాయల్స్‌ కష్టాల్లో పడింది. వాట్సన్‌ (19) , హోడ్జ్‌ (39), బిన్నీ నిలకడగా ఆడి 158 పరుగులకు చేర్చినా విజయాన్ని మాత్రం అందుకోలేక పోయింది. అనుభవజ్ఞుడైన ముంబై బౌలర్‌ మలింగాను ఎదుర్కొని పరుగులు సాధించడం చివరి ఓవర్‌లో యాగ్నిక్‌, కూపర్‌లకు సాథ్యం కాలేదు. దీంతో రాజస్థాన్‌కు 14 పరుగుల తేడాతో ఓటమి తప్పలేదు. ఈ సీజన్ లో తొలి మ్యాచ్ ఆడిన తారే అద్బుత బ్యాటింగ్ చేసినందుకు గాను మ్యాన్ ఆఫ్ ద మ్యాచ్ అవార్డు లభించింది.