అగ్ర స్థానంలో హైదరాబాద్ జట్టు

Posted: 04/20/2013 10:46 AM IST

ఐపీఎల్ సీజన్ - 6 ప్రారంభం కాకముందు సన్ రైజర్స్ హైదరాబాద్ జట్టు పై ఎవరికి అంచనాలు లేవు. ఎందుకంటే గత సీజన్లలో ఈ జట్టు వైఫల్యం చెందటమే. కానీ ఈ సీజన్ ప్రారంభం నుండి సన్ రైజర్స్ జట్టు చెలరేగి ఆడి అద్బుతమైన విజయాలను తన ఖాతాలో వేసుకుంటుంది. ఇప్పటి వరకు సొంత గడ్డ పై ఆడిన మూడు మ్యాచ్ ల్లో గెలిచి హ్యాట్రిక్ విజయం సాధించి పాయింట్ల పట్టికలో అగ్రస్థానంలో నిలిచింది. నిన్న రాత్రి పంజాబ్ తో జరిగిన మ్యాచ్ లో ఐదు వికెట్ల తేడాతో ఘన విజయం సాధించింది. మొదట బ్యాటింగ్ చేసిన పంజాబ్ జట్టు నిర్ణీత 20 ఓవర్లలో 9 వికెట్ల నష్టానికి 123 పరుగులు చేసింది. కెప్టెన్ గిల్‌క్రిస్ట్ (25 బంతుల్లో 26; 4 ఫోర్లు) టాప్ స్కోరర్‌గా నిలిచాడు. అనంతరం హైదరాబాద్ 18.5 ఓవర్లలో 5 వికెట్లకు 127 పరుగులు చేసింది. హనుమ విహారి (39 బంతుల్లో 46; 5 ఫోర్లు) రాణించగా, చివర్లో పెరీరా (11 బంతుల్లో 23 నాటౌట్; 3 సిక్స్‌లు) మెరుపులు మెరిపించాడు. పంజాబ్ జట్టు తొలి నాలుగు ఓవర్లలో 17 పరుగులే చేయగలిగింది. ప్రతి పరుగు కోసం తీవ్రంగా శ్రమించింది. సన్ రైజర్స్ బౌలర్ల ధాటికి భారీ స్కోరు చేయలేకపోయింది.

స్వల్ప విజయలక్ష్యంతో బరిలోకి దిగిన సన్‌రైజర్స్ కూడా ఆరంభంలోనే వికెట్ కోల్పోయింది. డి కాక్ (0) మరో సారి విఫలమయ్యాడు. అయితే విహారి మరో చక్కటి ఇన్నింగ్స్ ఆడి జట్టును నిలబెట్టాడు. పార్థివ్ స్థానంలో జట్టులోకి వచ్చిన అక్షత్ రెడ్డి (17 బంతుల్లో 19; 2 ఫోర్లు) అతనికి సహకారం అందించాడు. ఈ ఇద్దరు హైదరాబాదీలు కలిసి సునాయాసంగా పరుగులు రాబట్టి జట్టు విజయంలో కీలక పాత్ర పోషించారు.