ఢిల్లీ డేర్ డెవిల్స్ డబుల్ హ్యాట్రిక్

Posted: 04/19/2013 11:31 AM IST

ఐపీఎల్ సీజన్ 6లో ఢిల్లీ డేర్ డెవిల్స్ జట్టు అపజయాల్లో డబుల్ హ్యాట్రిక్ సాధించింది. ఇంత వరకు ఆడిన ఆరు మ్యాచ్ ల్లో ఒక్క మ్యాచ్ కూడా గెలవకుండా ఓడి అపకీర్తి మూటగట్టుకుంది. మొన్న బెంగుళూరుతో జరిగిన మ్యాచ్ లో పోరాట పటిమను కనబర్చిన ఢిల్లీ జట్టు నిన్న రాత్రి చెన్నైతో జరిగిన మ్యాచ్ లో కనీస పోటీ ఇవ్వకుండా ఘోర పరాజయం పాలైంది. ఈ ఓటమితో ఢిల్లీకి నాకౌట్ చేరే అవకాశాలు దాదాపు లేకుండా పోయాయి. ఢిల్లీలోని ఫిరోషా కోట్ల మైదానంలో జరిగిన మ్యాచ్ లో ఢిల్లీ 83 పరుగులకే కుప్పకూలి 86 పరుగుల భారీ తేడాతో ఓడిపోయింది. టాస్ గెలిచి బ్యాటింగ్ ఎంచుకున్న చెన్నై సూపర్ కింగ్స్  20 ఓవర్లలో 169 భారీ స్కోరు చేసింది. ఓపెనర్ మైకల్ హస్సీ 50 బంతుల్లో 65 పరుగులతో వీర విహారం చేయడంతో పాటు ధోని 23 బంతుల్లో 44 పరుగులు చేయడంతో చెన్నై కేవలం నాలుగు వికెట్లు కోల్పోయి భారీ స్కోరు సాధించింది. అనంతరం భారీ లక్ష్యాన్ని ఛేదించడానికి బరిలోకి దిగిన ఢిల్లీ లక్ష్యచేధనకు ఏ మాత్రం ప్రయత్నం చేయలేదు. వచ్చిన బ్యాట్స్ మెన్స్ వచ్చినట్లే పెవీలియన్ కి క్యూ కట్టడంతో ఢిల్లీ డేర్ డెవిల్స్ జట్టు 17.3 ఓవర్లలో 83 పరుగులకే కుప్పకూలి ఘోర పరాజయం పాలైంది.