ఈ ఇద్దరి పై మరో బాంబు పేల్చిన బీసీసీఐ

Posted: 04/07/2013 01:03 PM IST

పేలవ ఫామ్ లో ఉన్న వీరేంద్ర సెహ్వాగ్ వన్డే కెరీర్ ఇక ముగిసినట్లేనేమో? డాషింగ్ క్రికెటర్ వీరేంద్ర సెహ్వాగ్ అంతర్జాతీయ కెరీర్ ముగిసిందా అనే చర్చ జరుగుతున్న నేపథ్యంలో... బీసీసీఐ మరో బాంబు పేల్చింది. 30 మంది సభ్యుల చాంపియన్స్ ట్రోఫీ ప్రాబబుల్స్ జాబితాలో సెహ్వాగ్‌కు చోటు దక్కలేదు. వీరూతో పాటు పేసర్ జహీర్ ఖాన్, ఆఫ్ స్పిన్నర్ హర్భజన్ సింగ్‌లపై కూడా వేటు వేశారు. ఆశ్చర్యకరంగా చతేశ్వర్ పుజారా, ప్రజ్ఞాన్ ఓజాలను కూడా వదిలేశారు. జమ్మూకాశ్మీర్ ఆల్‌రౌండర్ పర్వేజ్ రసూల్‌కు ఈ జాబితాలో చోటు దక్కింది. ఇటీవల టెస్టు జట్టులో స్థానం కోల్పోయిన గంభీర్‌కు మాత్రం తిరిగి చోటు కల్పించారు. పలువురు యువ క్రికెటర్లకూ అవకాశం లభించింది. హైదరాబాదీ అంబటి తిరుపతి రాయుడితో పాటు మధ్యప్రదేశ్ ఆల్‌రౌండర్ జలజ్ సక్సేనా, మహారాష్ట్ర మిడిలార్డర్ బ్యాట్స్‌మన్ కేదార్ జాదవ్, మధ్యప్రదేశ్ పేసర్ ఈశ్వర్ పాండే, పంజాబ్ సీమర్ సిద్ధార్థ్ కౌల్‌లకు స్థానం దక్కింది. జూన్‌లో ఇంగ్లండ్‌లో జరిగే ఈ టోర్నీ కోసం మరో నెల రోజుల తర్వాత 15 మందితో తుది జాబితాను తయారు చేస్తారు. ఇటీవల ఆస్ట్రేలియాతో జరిగిన టెస్టు సిరీస్‌లో రాణించిన మురళీ విజయ్, శిఖర్ ధావన్‌లతో పాటు గాయాల కాలంగా కనుమరుగైన ఉమేశ్ యాదవ్, ప్రవీణ్ కుమార్ మళ్లీ వచ్చారు. టెస్టుల్లో ద్రవిడ్ వారసుడిగా పేరు తెచ్చుకున్న పుజారాతో పాటు హైదరాబాదీ స్పిన్నర్ ప్రజ్ఞాన్ ఓజాకూ నిరాశే మిగిలింది.